პოლიციამ ყაზბეგში განზრახ მკვლელობის ბრალდებით რუსეთის ფედერაციის მოქალაქე, 40 წლის პირი დააკავა. შინაგან საქმეთა სამინისტროს განცხადებით, გამოძიებამ დაადგინა, რომ მიმდინარე წლის 14 სექტემბერს, სასაზღვრო გამშვები პუნქტი დარიალის მიმდებარე ტერიტორიაზე, ურთიერთშელაპარაკებისას წარმოშობილი კონფლიქტის დროს, დაკავებული ვ.გ.-ს მამას — 1956 წელს დაბადებულ ა.გ.-ს საქართველოსა და რუსეთის ორმაგმა მოქალაქემ, 1981 წელს დაბადებულმა ა. მ.-მ მიაყენა ჯანმრთელობის დაზიანება, რის შედეგადაც ა.გ. გარდაიცვალა.

"ამის შემდეგ, გარდაცვლილი ა.გ.-ს შვილმა ვ.გ.-მ, შურისძიების მოტივით, ცივი იარაღისა და ბლაგვი საგნის გამოყენებით მრავლობითი დაზიანება მიაყენა ა.მ.-ს, რასაც მისი გარდაცვალება მოჰყვა", — აცხადებენ შსს-ში.

მათივე ინფორმაციით, პოლიციამ ვ.გ. მომხდარიდან რამდენიმე საათში დააკავა. გამოძიება განზრახ მკვლელობის ფაქტზე საქართველოს სისხლის სამართლის კოდექსის 108-ე მუხლით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.