რუსეთში ცხოველთა ექსპერტების ყურადღება გამორჩეულმა პატარა სელაპმა მიიპყრო.

წინა კვირას ზღვის ძუძუმწოვართა ბიოლოგმა ვლადიმირ ბურკანოვმა Instagram-ზე გაავრცელა ჩანაწერი და ფოტოები, რომლებშიც მან რუსეთში ტიულენიის კუნძულის იშვიათი ალბინოსი სელაპი აღბეჭდა. ველური ბუნების ამ ფოტოებში ნარინჯისფერი სელაპი თავისი შავი თანამოძმეებისგან მარტივად გამოირჩევა — მას თავისი ფარფლები ძირს ჩამოუბაჯბაჯებია და სხვა ნაშიერების გვერდით ჩამომჯდარა.

ამ გამორჩეულ პატარა სელაპს "მახინჯი იხვის ჭუკი" შეარქვეს.

"მახინჯი იხვის ჭუკი — ალბინოსი სელაპი იშვიათი სანახაობაა... უფრო მოწითალოა, ვიდრე თეთრი. ეს სუფთა ალბინოსია, რომელსაც პიგმენტაცია თვალებშიც კი არ აქვს", — დაწერა ბურკანოვმა.

Instagram-ის მომდევნო პოსტში ბურკანოვმა ალბინოსი სელაპის მსგავსი შემთხვევა გაიხსენა და თავისი კოლეგის, სერგეი ფომინის, ბერინგის კუნძულზე 2017 წლის შემოდგომაზე გადაღებული სელაპის ფოტო დაპოსტა.

"ეს ცხოველი 2 ან 3 წლის იქნებოდა, ფიზიკურად კარგ ფორმაში იყო მიუხედავად იმისა, რომ ცუდი მხედველობა ჰქონდა", — დაწერა მან მეორე შემთხვევის შესახებ და დაამატა, რომ სერგეიმ დაადასტურა, რომ მან იმავე ალბინოს სელაპს ამ ზაფხულსაც გადაუღო.

"[სერგეის] მივმართე, რათა იმ ალბინოსის ასაკი გამერკვია, და სერგეიმ მითხრა, რომ მან ზუსტად იგივე სელაპი ამ ზაფხულსაც იხილა და მას ფოტოები გადაუღო, თანაც ზუსტად იმავე ლოკაციაზე, სადაც ცხოველი 2017 წლის შემოდგომაზე ნახა", — დაწერა ბურკანოვმა.

"ის ალბინოსი ახლა უკვე ზრდასრული მამრია, ასე 5-6 წლის. ეს, სავარაუდოდ, პირველი დოკუმენტირებული შემთხვევაა, როცა უჩვეულო ფერის ჩრდილოური სელაპი ზრდასრულობამდე გადარჩა", — თქვა ბიოლოგმა.

ალბინოსი სელაპის დაბადების ალბათობა 100 000-იდან 1-ია და ის სხვა სელაპების მხრიდან გარიყვის რისკის ქვეშ არის. მიუხედავად ამისა, ბურკანოვმა თქვა, რომ მის გადაღებულ სელაპს სხვები მაინცდამაინც არ არიდებენ თავს.

"სელაპის ეს ნაშიერი კარგად გამოკვებილს ჰგავდა და ძალიან აქტიური იყო, ამიტომ, როგორც ჩანს, დედამისმა ბევრი რძე მისცა. მაგრამ მას სხვა სელაპები არ დასდევენ და არ კბენენ", — თქვა ბურკანოვმა.

ბიოლოგმა დაამატა, რომ ცხოველთა ექსპერტები სელაპს აკვირდებიან და ჩარევას გეგმავენ, თუკი მას მისი თემი გარიყავს.

ფოტო: Vladimir Burkanov