ამერიკის შეერთებული შტატების რესპუბლიკური პარტიის პრეზიდენტობის კანდიდატი დონალდ ტრამპი ამბობს, რომ შესაძლოა, დიდი ბრიტანეთის პრემიერმინისტრ დევიდ კამერონთან არც ისე კარგი ურთიერთობა ჰქონდეს, ამის შესახებ მან ბრიტანულ ტელეარხ ITV-ის ეთერში განაცხადა:

"ვფიქრობ არც ისე კარგი ურთიერთობა გვექნება, ვინ იცის. მე მსურდა მასთან კარგი ურთიერთობა, მაგრამ, როგორც ჩანს, მისი მხრიდან იგივე დამოკიდებულება არ იგრძნობა".

BBC-ის ინფორმაციით, ტრამპმა კამერონის იმ განცხადებას უპასუხა, რომელშიც ბრიტანეთის პრემიერმინისტრმა მას "სულელი, გამომწვევი და მცდარი" უწოდა მუსლიმებისთვის ამერიკაში შესვლის აკრძალვის მოწოდების გამო.

ტრამპმა ასევე აღნიშნა, რომ არ დაავიწყდება ლონდონის ახალი მერის სადიქ ხანის ის "საძაგელი განცხადება", რომელშიც მას უვიცი უწოდეს:

"მე შეურაცხყოფილი ვარ, ისინი არც კი მიცნობენ. ძალიან უხეში განცხადებები იყო".

სადიქ ხანმა, რომელიც ქალაქის პირველი მუსლიმი მერია, ცოტა ხნის წინ აღნიშნა, რომ ტრამპის დამოკიდებულება ისლამის მიმართ ინგლისსა და ამერიკას საფრთხეს უქმნის, ამ განცხადებას ტრამპმა მისი მხრიდან უვიცობა უწოდა.