"დონალდ ტრამპის განცხადებები ექსტრემისტებს უწყობს ხელს" - უთხრა ლონდონის ახალმა მერმა ნიუ-იორკ თაიმსის ჟურნალისტს ოთხშაბათს, 11 მაისს, ლონდონის მერიაში გამართულ შეხვედრაზე.

სადიქ ხანის თქმით, მისი ლონდონის მერად არჩევა იმ დისკუსიის ფონზე, რომელიც მის რელიგიას შეეხებოდა, კარგი გაკვეთილია ტრამპისთვის იმის გასაგებად, რომ ისლამი დასავლურ ღირებულებებს იდეალურად ეწყობა.

"ტრამპი ისლამთან დაკავშირებით უმეცრებას ავლენს. Daesh-სა და ISIS-ს აღიზიანებს ის ფაქტი, რომ მე ვარ მუსლიმი და ამასთან ერთად ვარ ლონდონის მერი. რატომ? იმიტომ, რომ მათი თქმით, ისლამი დასავლურ ღირებულებებს ვერ ეწყობა".

ლეიბორისტული პარტიის წევრმა სადიქ ხანმა აღნიშნა, რომ არჩევნებში მისმა კონკურენტმა ზაკ გოლდსმიტმა, რომელიც კონსერვატიულ პარტიას წარმოადგენს, მის წინააღმდეგ დონალდ ტრამპის მსგავსი კამპანია დაიწყო:

"თუმცა, ლონდონმა აირჩია ერთიანობა და არა დაყოფა [რელიგიური ნიშნით]. ლონდონის მოსახლეობამ არ მიიღო შიშის პოლიტიკა".

ლონდონის მერმა იმედი გამოთქვა, რომ ამერიკა შიშზე დაფუძნებულ პოლიტიკას არ მიიღებს და ლონდონის მაგალითს გაიზიარებს.

სადიქ ხანი ევროკავშირის ყველაზე დიდი ქალაქის პირველი მუსლიმი მერია. ის ლონდონის მოსახლეობამ 2016 წლის მაისში აირჩია.

გამარჯვების შემდეგ ახალმა მერმა ამომრჩეველს მიმართა და განაცხადა, რომ ის ყველა ლონდონელის მერი იქნება და დედაქალაქში დამკვიდრებული უთანასწორობის წინააღმდეგ იბრძოლებს.