საგარეო საქმეთა სამინისტროს წარმომადგენლის, მარია ზახაროვას პოსტის გამო პრეზიდენტმა ვლადიმერ პუტინმა და საგარეო უწყების მინისტრმა, სერგეი ლავროვმა სერბეთის პრეზიდენტ ალექსანდრ ვუჩიჩს ბოდიში მოუხადეს. ფეისბუქში გამოქვეყნებულ პოსტში ზახაროვამ თეთრ სახლში შეხვედრაზე მყოფი ვუჩიჩი ფილმ ძირითადი ინსტინქტის პერსონაჟს შეადარა.

ზახაროვას პოსტმა ბელგრადში დიდი უკმაყოფილება გამოიწვია. ის გააკრიტიკა თვითონ ვუჩიჩმაც. ბოდიშის მოხდის შესახებ ვუჩიჩმა ეროვნული ტელევიზიის ეთერით ისაუბრა. მისი სიტყვები პუტინის პრესსპიკერმაც დაადასტურა.

"პრეზიდენტ პუტინს ჩემ წინაშე ბოდიში არასდროს მოუხდია, სერგეი ლავროვსაც. ამის გამო [ზახაროვას პოსტის] ეს ორივემ გააკეთა. ამასთან, მე ეს არასდროს მიხსენებია და როგორც კარგად აღზრდილი პიროვნება, ამას არასდროს ვახსენებდი. მიმაჩნია, რომ კარგი ურთიერთობა გვაქვს და ეს ჩემთვის რიგითი, უსიამოვნო ინციდენტია", — განაცხადა ვუჩიჩმა.

წინა კვირას სერბეთისა და კოსოვოს ლიდერები ვაშინგტონში იმყოფებოდნენ, სადაც აშშ-სთან ორმხრივ შეთანხმებას მოაწერეს ხელი.

მალევე ზახაროვამ გამოაქვეყნა ფოტო დონალდ ტრამპთან ვუჩიჩის შეხვედრიდან და კადრი ფილმ ძირითადი ინსტინქტიდან, რასაც თან ახლდა წარწერა: "თუ თქვენ თეთრ სახლში მიგიწვიეს, ხოლო სკამი ასე დადგეს, თითქოს დაკითხვაზე ხართ, დაჯექით როგორც მეორე ფოტოზეა აღწერილი. ვინც არ უნდა იყოთ. უბრალოდ, მენდეთ".

ფოტო: მარია ზახაროვა / Facebook

კრიტიკის შემდეგ ზახაროვამ პოსტს დაამატა, რომ ხუმრობის ობიექტი არა პრეზიდენტი ვუჩიჩი, არამედ ამერიკელი დიპლომატები იყვნენ.