ევროპული საქართველოს ერთ-ერთი ლიდერი, ზუგდიდის მაჟორიტარობის კანდიდატი, გიგი უგულავა, ქვეყანაში შექმნილ ეკონომიკურ კრიზისზე საუბრობს.

გიგი უგულავას თქმით, პანდემიის პერიოდში, მთავრობამ მოგუდა მთლიანად ეკონომიკა და ამავდროულად, ეპიდემიოლოგიური ვითარებაც მძიმდება. უგულავამ აღნიშნა, რომ ხელისუფლებას არ აინტერესებს ადამიანების ეკონომიკური და სოციალური სიდუხჭირე და მათთვის მთავარია ეპიდემიოლოგიური ვითარება, რომლითაც ისინი იწერენ პოლიტიკურ დივიდენდებს.

"უკიდურესი სიბეცე და თავისი თავის მოტყუებაა იმის არ შემჩნევა, რომ ქვეყანაში არის მძიმე ეკონომიკური კრიზისი. ეს ჩანს ციფრებით, ეს ჩანს შეუიარაღებელი თვალით და განსაკუთრებით ეს ჩანს ჩვენ სოფლებში, სადაც გაუსაძლისი უბედურება ტრიალებს. ამას ემატება მუდმივი დაშინება ხელისუფლების მხრიდან და ის, რომ საზოგადოების უდიდეს ნაწილს, განსაკუთრებით რეგიონებში არ სჯერა ხელისუფლების, ეს ისევ ხელისუფლების ბრალია. როდესაც იყო პანიკა, ჩვენ ვნახეთ, რომ ხელისუფლება კორონას საკითხს იყენებდა პოლიტიკური დივიდენდების არათუ დასაწერად, არამედ ოპოზიციასთან საბრძოლველად", — აღნიშნავს უგულავა

მისი თქმით, ქართულმა ოცნებამ ყველა თავისი პრობლემის მოგვარება გადაწყვიტა კოვიდით.

"რას მოიმოქმედებს ეს ხელისუფლება, ძნელად პროგნოზირებადია, თუ გადაიდება არჩევნები, ხელისუფლებისთვის ეს იქნება დანგრევის ნიშანი, არ გადაიდება და ის დგას რეალური პრობლემის წინაშე. რატომ აირჩია ხელისუფლებამ ეკონომიკის მოგუდვის გზა, თუ პანდემია მასთან თანაცხოვრების მანძილზე უნდა გადაძლეულიყო. ასევე, თუ თანაცხოვრება იყო გამოსავალი, ის რაც მთელმა მსოფლიომ გააკეთა, ჩვენთან პირიქით, ამოგუდვის გზით წავედით და საზოგადოებამ დაინახა, რომ აქ არის პოლიტიკური მდგენელი და ამის გამო აღარავინ იცავს იმ წესებს, რომლებსაც სხვა ქვეყნებში იცავენ", — აცხადებს უგულავა.

უგულავა ამბობს, რომ ხელისუფლებამ ერთჯერადად გადაწყვიტა, რომ პოლიტიკური დივიდენდი მიიღოს.

"საბოლოო ჯამში, ამის საზღაურს იხდის ადამიანი, ჩვენი ოჯახები ეკონომიკურად და ჩვენი ჯანმრთელობა. ჩვენ ვხედავთ, რომ ეს ციფრი არის მზარდი და ჩვენს ხელისუფლებას არც ეკონომიკიდან კრიზისის გამოსვლის და არც რეალური მართვის გეგმა არ აქვს. ერთადერთი გამოსავალი არის ცვლილებები, დრამატული და გარდამტეხი ცვლილებები არჩევნებზე, მხოლოდ ეს შეძლებს ადამიანს დაუბრუნოს იმედი მომავლის, რამაც შეიძლება საფუძველი შეუქმნას ეკონომიკის განვითარებას. ფაქტია, რომ ყველანაირი სიკვდილი ამ ხელისუფლების მიერ არის დაშვებული, გარდა კოვიდისა, რადგან აქ არსებობს პოლიტიკური მდგენელი და ხელისუფლებას პოლიტიკური დივიდენდების დაწერა სურს", — განაცხადა გიგი უგულავამ.