პარტია ჩვენი საქართველო — სოლიდარობის ალიანსის განცხადებით, მას შემდეგ, რაც მათ პოლიტიკურ მდივანს, ლევან გოგიჩაიშვილს კორონავირუსი დაუდასტურდა, მიიღეს გადაწყვეტილება, წინასაარჩევნოდ პაუზა აიღონ. მათივე თქმით, უახლოეს დღეებში ჩაუტარდებათ ტესტირება გუნდის თითოეულ წევრს.

"დაავადებათა კონტროლის ეროვნული ცენტრის თითოეულ რეკომენდაციას თანმიმდევრულად შეასრულებს პარტია ჩვენი საქართველო — სოლიდარობის ალიანსის თითოეული წარმომადგენელი. ეპიდემიოლოგიური სამსახური უკვე ჩართულია", — ვკითხულობთ ოფიციალურ განცხადებაში.

პარტიის ცნობით, ყველა ის პირი, ვისაც ლევან გოგიჩაიშვილთან კონტაქტი ჰქონდა, თვითიზოლაციაშია გადაყვანილი. მათივე თქმით, იმ ღონისძიებებში, რომელიც ბოლო პერიოდში პარტიის ინიციატივით ჩატარდა, ლევან გოგიჩაიშვილი არ მონაწილეობდა.

"ჩვენი საქართველო — სოლიდარობის ალიანსი საზოგადოებას ეტაპობრივად მიაწვდის სიახლეებს ლევან გოგიჩაიშვილისა და მისი მეუღლის, ვიკა ბუკიას ჯანმრთელობის მდგომარეობასთან დაკავშირებით", — აცხადებენ პარტიაში.

პარლამენტის დამოუკიდებელ დეპუტატს, ლევან გოგიჩაიშვილს კორონავირუსი დაუდასტურდა. ინფორმაცია On.ge-ს ცოლმა, ვიკა ბუკიამ დაუდასტურა, რომელიც ასევე ინფიცირებულია.

გაიგეთ მეტი: