პარლამენტის დამოუკიდებელი დეპუტატის, ლევან გოგიჩაიშვილის განცხადებით, მისთვის უცნობია, ვინ ან რა გახდა კორონავირუსით ინფიცირების წყარო. დეპუტატის ვარაუდით, შესაძლოა, წყარო პარლამენტიც იყოს.

"სავარაუდოდ, ბოლო ორი დღე შეხება ვისთანაც მქონდა, ის ადამიანები იქნებიან. წარმოდგენა არ მაქვს, ვინ არის წყარო", — განაცხადა გოგიჩაიშვილმა On.ge-სთან საუბრისას.

დეპუტატის თქმით, მის შვილებს ვირუსი არ დადასტურებიათ. მისივე თქმით, NCDC-მ სტაციონარში გადასვლის რეკომენდაცია მისცა და რამდენიმე საათში წაიყვანენ.

ეს პირველი შემთხვევაა, როცა კორონავირუსი პარლამენტის დეპუტატს დაუდასტურდა. გოგიჩაიშვილი პარლამენტში 3 სექტემბერს იმყოფებოდა და პლენარულ სხდომას ესწრებოდა.

9 სექტემბრის მონაცემებით, საქართველოში კორონავირუსის 44 ახალი შემთხვევა გამოვლინდა, გამოჯანრთელდა 4 ადამიანი. მონაცემები StopCov-ზე განახლდა.

ჯამში, საქართველოში კორონავირუსის დადასტურებულ შემთხვევათა რაოდენობა 1 773-მდე გაიზარდა, ამათგან 1 325 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 5 882, სტაციონარში მეთვალყურეობის ქვეშ კი — 390.