ევროპული საქართველოს მაჟორიტარობის კანდიდატი ვაკე-საბურთალოს ოლქში, ელენე ხოშტარია, წყნეთში ადგილობრივი მოსახლეობის პროტესტს შეუერთდა, რომლებიც მრავალბინიანი საცხოვრებელი სახლის მშენებლობას აპროტესტებენ.

ელენე ხოშტარიას თქმით, უნდა დაკმაყოფილდეს ადგილობრივების მოთხოვნა და მშენებლობის პროცესი უნდა შეჩერდეს მანამ, სანამ არ იქნება შესწავლილი და გამოკვლეული შესაბამისი საფრთხეები. ხოშტარიამ აღნიშნა, რომ განაშენიანების ამგვარი პოლიტიკა დაანგრევს ქალაქს.

"მოსახლეობის მოთხოვნა არის, რომ ახლა ეს პროცესი შეჩერდეს, საშიშროების სერიოზული შესწავლა მოხდეს აქ და მხოლოდ ამის მერე იქნას მიღებული გადაწყვეტილება. გლობალურად კი, გადაწყვეტილების მიღების მექანიზმი, სადაც ფორმალობაა უბრალოდ ბუნების შესწავლა და ისე გაიცემა ნებართვები, უნდა შეიცვალოს. ასეთი დამოკიდებულება, რომ სადაც რა ჩაეტევა, ის ააშენო, უბრალოდ დაანგრევს ჩვენს ქალაქს", — განაცხადა ელენე ხოშტარიამ.