დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, თუ რაიმე განსაკუთრებული არ მოხდა, აჭარის ჩაკეტვაზე ან ღონისძიებების გამკაცრებაზე საუბარი არ იქნება. მისი განცხადებით, კორონავირუსთან თანაცხოვრება უნდა ვისწავლოთ.

"კორონავირუსული ინფექცია არ გაქრება არც ერთ თვეში, არც ხუთ თვეში. დაახლოებით, ერთი წელი, წელიწად-ნახევარი მოგვიწევს მასთან ერთად ცხოვრება. როგორ ვცხოვრობთ გრიპთან ერთად, ხომ არ ვკეტავთ ქვეყანას? როგორ ვცხოვრობთ დიაბეტთან და სხვა დაავადებებთან ერთად? უნდა გავითავისოთ, რომ ეს დაავადება გაჩნდა და არ მოისპობა, ჯერჯერობით, სანამ ვაქცინა არ შემოვა ჩვენს ხმარებაში", — აცხადებს გამყრელიძე.

მისი თქმით, "მიკრო" ღონისძიებები, რომელიც მესტიაში, ყარაჯალარში, ბოლნისსა და სხვა პუნქტებში გამოიყენეს, შესაძლებელია იყოს, მაგრამ არა ისეთი მასშტაბით, რომ აჭარის ჩაკეტვა გახდეს საჭირო.

6 სექტემბრის მონაცემებით, საქართველოში კორონავირუსის 29 ახალი შემთხვევა გამოვლინდა, 8 ადამიანი გამოჯანმრთელდა.

ჯამში, საქართველოში კორონავირუსის დადასტურებულ შემთხვევათა რაოდენობა 1 650-მდე გაიზარდა, ამათგან 1 310 უკვე გამოჯანმრთელდა, 19 კი გარდაიცვალა. კარანტინის რეჟიმში იმყოფება 6 020, სტაციონარში მეთვალყურეობის ქვეშ კი — 299.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: