არიზონაში, ფენიქსში, ძაღლების სამაშველო ცენტრი Sunshine Dog Rescue ახლა ავსტრალიურ მეცხვარეზე, ჯორჯიაზე, ზრუნავს, რომელმაც ნაადრევად იმშობიარა და ამის გამო სამი ლეკვი დაკარგა.

"ნაადრევი მშობიარობის გარდა მის დღენაკლულ ლეკვებს საშვილოსნოს გარეთ სიცოცხლის გაგრძელების შანსი არ ჰქონდათ. გული ძალიან დამძიმებული მაქვს ამ ლეკვების გამო, რომელთაც სირბილისა და თამაშის შანსი არ მიეცათ, ასევე ძალიან ვწუხვარ ჯორჯიას გამო. ის თავის შვილებს ეძებს და ეს ძალიან რთული საყურებელია", — დაწერა ძაღლების სამაშველო ცენტრმა 13 აგვისტოს Facebook-ზე.

შვილების დაკარგვის შემდეგ ჯორჯია გაშმაგებით ეძებდა თავის ლეკვებს. დადარდიანებულ ძაღლს მომვლელებმა სათამაშო ცხოველი მისცეს, რომელსაც ხელოვნური გულისცემა ჰქონდა, რათა მისი ნაშიერის სიმულირება მოეხდინა და ძაღლი დაემშვიდებინა.

მიუხედავად ამისა, რამდენიმე დღის შემდეგ ცენტრმა სამი უდედო ახალშობილი კნუტი მოიყვანა და ისინი ჯორჯიას გააცნო — ცუგას კნუტები მომენტალურად შეუყვარდა. "[ძაღლი] მათზე გიჟდება", — დაწერა ცენტრმა 15 აგვისტოს.

ორი დღის შემდეგ ერთი კნუტი დაიღუპა, თუმცა დანარჩენი ორი "ძალიან კარგად გრძნობდა თავს და ბოთლიდან იკვებებოდა". "ჯორჯია ძალიან დიდ ყურადღებას იჩენს დარჩენილი ორი კნუტის მიმართ, რომლებიც ჯანმრთელად გამოიყურებიან და საკმაოდ კარგად არიან. დაილოცოს ეს პატარა ოჯახი ❤️", — დაამატა ცენტრმა.

გადარჩენილ კნუტებს გრაფიტი და გამბოლი შეარქვეს. მათ პატარა ნარინჯისფერი კნუტიც მიემატა, გუბერი. "თვალები უკვე ყველამ გაახილა, წონაშიც იმატებენ (ახლა დაახლოებით 200-220 გრამია თითო), და ახალი დედიკოთი კმაყოფილები არიან", — დაწერა Sunshine-მა 20 აგვისტოს.

ჯორჯია — რომელსაც თავის ახალ სახლში მილო ერქმევა — თავის აყვანილ კნუტებთან ახლა ძალიან კარგად გრძნობს თავს.