აშშ-ს პრეზიდენტის, დონალდ ტრამპის განცხადებით, მისი ადმინისტრაცია რუსი ოპოზიციონერის, ალექსეი ნავალნის საქმეს ყურადღებით შეისწავლის, თუმცა ჯერ არც ერთი მტკიცებულება არ უნახავთ.

"ზუსტად არ ვიცი, რა მოხდა. ეს ტრაგიკულია, ეს არ უნდა მომხდარიყო. ჯერ არც ერთი მტკიცებულება არ გვაქვს, მაგრამ საქმეს დავაკვირდები", — განაცხადა ტრამპმა პრესკონფერენციის დროს.

მისივე თქმით, აშშ-მ ყურადღებით უნდა ადევნოს თვალი ნავალნის საქმეს. გარდა ამისა, მან აღნიშნა, რომ არ აქვს არანაირი საფუძველი იმისა, რომ გერმანიის მთავრობის დასკვნებს არ ენდოს. რუსეთზე საუბრისას კი დონალდ ტრამპმა ჩინეთიც ახსენა.

"საინტერესოა, რომ ყველანი ყოველთვის რუსეთს ახსენებენ. და მე არ ვარ წინააღმდეგი, რომ რუსეთი ახსენოთ, მაგრამ, ვფიქრობ, რომ ჩინეთია ის ქვეყანა, რომელზეც იმაზე უფრო ხშირად უნდა საუბრობდეთ, ვიდრე რუსეთზე", — განაცხადა მან.

რუსი ოპოზიციონერის მოწამვლის საქმეზე აშშ-ს სახელმწიფო დეპარტამენტი დეტალურ და ობიექტურ გამოძიებას მოითხოვს. ამასთან, ისინი დამნაშავეების დასჯასაც მოითხოვენ.

კორუფციასთან ბრძოლის ფონდის ხელმძღვანელი, ალექსეი ნავალნი ომსკის საავადმყოფოში, 20 აგვისტოს მოათავსეს. გერმანელმა ექიმებმა დაადგინეს, რომ ის მოწამლულია. გერმანიის მთავრობის განცხადებით, ალექსეი ნავალნი "ნოვიჩოკით" მოწამლეს. ეს არის ქიმიური ნივთიერება, რომელიც ნერვიულ სისტემას ანადგურებს.

რუსეთის საგარეო საქმეთა სამინისტროში მიაჩნიათ, რომ ნავალნის მოწამვლა ფაქტებით არ არის განმტკიცებული.