საქართველოს პარლამენტის წევრი, გედევან ფოფხაძე საარჩევნო კოდექსში შესატანი ცვლილებების შესახებ კანონპროექტის უკან გაწვევას მოითხოვს. ის თავის კოლეგებს მოუწოდებს, ინიციატივას მხარი არ დაუჭირონ, რადგან მისივე თქმით, კანონპროექტი არაფრის მომცემი არის.

"თუ არავის ვსჯით, მაშინ რატომ ვამკაცრებთ ამ კანონებს? ეს კანონი არავის სჭირდება", — განაცხადა გედევან ფოფხაძემ პარლამენტის პლენარულ სხდომაზე სიტყვით გამოსვლისას.

ქართული ოცნებამ დღეს 2 სექტემბერს პარლამენტის პლენარულ სხდომაზე საარჩევნო კოდექსში შესატანი ცვლილებების შესახებ ინიციატივა წარადგინა. მომხსენებლის, მმართველი გუნდის დეპუტატის, რატი იონათამიშვილის განცხადებით, ცვლილებებით შესაძლებელი იქნება მოხდეს პრევენცია, ამომრჩეველზე ზეგავლენა (დაშინება, იძულება, ან მისი ფარულობის დარღვევა) ვერავინ მოახდინოს. ცვლილებები, ძირითადად, ამომრჩევლის დაშინების ან იძულების ჩანაწერის გამკაცრებას გულისხმობს. საუბარია სასჯელის რამდენიმე თვით ან წლით გაზრდაზე.

ოპოზიციისთვის გაუგებარია, მაინც და მაინც ახლა რატომ გადაწყვიტა ქართულმა ოცნებამ კანონპროექტის ინიცირება და რამდენად რეალური იქნება აღსრულების მექანიზმი.