"სააკაშვილი დაგვპირდა და ვარშალომიძე ჩამოვიდა, რა შევუკვეთეთ — რა ჩამოვიდა", — ასე ეხმაურება პარლამენტის თავმჯდომარის მოადგილე მამუკა მდინარაძე აჭარის ავტონომიური რესპუბლიკის მთავრობის ყოფილი თავმჯდომარის, ლევან ვარშალომიძის ჩამოსვლას.

"მე მგონი, კომენტარი არ არის ამაზე საჭირო, უნდა მოვუსმინოთ. მე მოვუწოდებ ყველა ამომრჩეველს, ტრაბზონში იყო თუ არ ვცდები, თურქეთიდან რომ შემოდიოდა ეს ადამიანი, ტელე თუ ვიდეომიმართვა გაავრცელა და ის ნახოს. მე ვფიქრობ, შემდეგ ლევან ვარშალომიძის შანსებზე აჭარაში კომენტარიც აღარ იქნება საჭირო", — განაცხადა მამუკა მდინარაძემ.

მამუკა მდინარაძემ, ნაცმოძრაობის ყველა წარმომადგენელს მოუწოდა, რომ როდესაც რუსულ საქმეზე ლაპარაკობენ — პასუხი გასცენ კითხვას, თუ რატომ დაუჭირა მათმა პარტიამ მხარი ქართველი ჯარისკაცების მიერ "ვითომ ომის დაწყებას", რატომ დაუშვეს ეს და რატომ დაუჭირეს მხარი თითქოს რუსული შეტევა იყო საპასუხო.

ლევან ვარშალომიძემ განაცხადა, რომ წინასაარჩევნოდ ბათუმში ჩამოდის. ნაციონალური მოძრაობის წევრმა განაცხადა, რომ თუ ვინმეს ეგონა, უკრაინაში მაღალი პოზიციის გამო საქართველოს ბედზე ხელს ჩაიქნევდა და "ამ საბედისწერო მომენტში პირად კომფორტს ამჯობინებდა", შეცდა.