ესპანელი მსახიობი ანტონიო ბანდერასი COVID-19-სგან გამოჯანმრთელდა. ამის შესახებ მან ინსტაგრამზე დაწერა და სახალისო ფოტოც გამოაქვეყნა, რომელშიც ჩანს, როგორ ამარცხებს "კორონავირუსს":

"21-დღიანი დისციპლინური შინაპატიმრობის შემდეგ, შემიძლია ვთქვა, რომ COVID-19-ის ინფექციისგან განვიკურნე. ვიზიარებ ყველას მდგომარეობას, ვისაც ჩემსავით არ გაუმართლა და ვფიქრობ მათზეც, ვისაც იმაზე რთულ სიმპტომებთან მოუწიათ გამკლავება, ვიდრე მე მქონდა. ძალას ვუსურვებ ყველას, ვინც ინფექციას ებრძვის".

ანტონიო ბანდერასმა კორონავირუსით ინფექცირებაზე ორშაბათს, 10 აგვისტოს, თავის მე-60 დაბადების დღეზე განაცხადა.

"ყველას მოგესალმებით. მსურს, გავასაჯაროვო, რომ დღეს, 10 აგვისტოს, იძულებული ვარ, ჩემი მე-60 დაბადების დღე კარანტინში აღვნიშნო, რადგან COVID-19 დამიდგინდა", — თქვა ბანდერასმა.

ამ განცხადებით ბანდერასი შეუერთდა იმ ცნობილი ადამიანების სიას, რომლებმაც კორონავირუსის დიაგნოზი საჯაროდ განაცხადეს. მათ შორის არიან ტომ ჰენკსი, რიტა უილსონი, ენდი კოენი, ლენა დანჰემი, Pink და იდრის ელბა.

წინა წლის ოქტომბერში ბანდერასმა People-თან ინტერვიუში განაცხადა, თუ როგორ იმოქმედა 2017 წელს გულის შეტევამ მის ცხოვრებისეულ შეხედულებებზე.

"ასეთი რაღაც როცა გემართება — სიკვდილს პირისპირ ხედავ — ძალიან ბევრ რამეს ეფინება ნათელი", — თქვა მან.

ბანდერასს გულის შეტევა 2017 წლის იანვარში ჰქონდა, როდესაც ვარჯიშისას გულმკერდის მიდამოში ტკივილები დაეწყო. "26 იანვარს მე გულის შეტევა მქონდა, თუმცა სერიოზული არ იყო და ზიანი არ გამოუწვევია", — განუცხადა მან ჟურნალისტებს იმ წლის მარტში.

The Spy Kids-ის მსახიობმა ახსნა, რომ მისი ჯანმრთელობის საფრთხის ქვეშ დაყენების შემდეგ მან გაიაზრა, რა იყო ყველაზე მნიშვნელოვანი: "ოჯახი, მეგობრები და იმ მსახიობის დაბრუნება, რომელიც მე ოდესღაც ვიყავი".