29 წლის ჯეიკობ ბლეიქი, რომელსაც შვილების თანდასწრებით პოლიციამ ზურგში ესროლა, პარალიზებულია. ამერიკული მედია ABCnews-ის ცნობით, ბლეიქი საავადმყოფოში მძიმე მდგომარეობაში იმყოფება და ექიმებმა არ იციან შეძლებს თუ არა ის ოდესმე ისევ გავლას.

"მას შვიდჯერ ესროლეს, თითქოს მისი სიცოცხლე არაფერს წარმოადგენდა. თითქოს ჩემი შვილის სოცოცხლე მნიშვნელოვანი არ იყო, მაგრამ ჩემი შვილის სიცოცხლე ძალიან მნიშვნელოვანია. ის ცოცხალი არსებაა და მისი სიცოცხლეც ფასობს, — განაცხადა ჯეიკობის მამამ.

24 აგვისტოს მომხდარმა სროლამ კენოშაში, უისკონსინის შტატში საპროტესტო აქციების ტალღა გამოიწვია. აქციის ასობით მონაწილემ დაწესებული კომენდანტის საათი უგულებელყო და 24-25 აგვისტოს მასობრივი არეულობაში ჩაერთო. მათ პოლიციის მანქანების მინები ჩაამსხვრიეს, ცეცხლი წაუკიდეს შენობებს, გაემართნენ პოლიციის ოფისისკენ, თუმცა ამ დროს სპეცრაზმმა მათ წინააღმდეგ ცრემლსადენი გაზი გამოიყენა.

დაშავებულის დედა, დედამისი იულია ჯექსონმა ABCnews-სთან ინტერვიუში თქვა, რომ ის სამართლიანობას მოითხოვს და ყველა ამერიკელს მოუწოდებს რასობრივი უთანასწორობაზე მაღლა დადგნენ და დაამარცხონ ის. მისივე თქმით, ის ლოცულობს პოლიციის ოფიცრებისა და მათი ოჯახის წევრებისთვისაც, რადგან ამით სურს აჩვენოს, თუ როგორ უნდა მოეპყრან ადამიანები ერთმანეთს.

"ამერიკა დიდებულია, როცა ჩვენ ვიქცევით კარგად", — აღნიშნა იულია ჯექსონმა.

ვიდეოში, რომელიც თვითმხილველის მიერაა გადაღებული, ჩანს როგორ მისდევს სამი ოფიცერი ბლეიქს და შემდეგ ერთი როგორ ესვრის მას ზურგში მრავალჯერ მაშინ, როცა ის მანქანის კარს აღებს და სავარძელში ჯდება. მისი სამი შვილი, რომლებიც ამ დროს მანქანის უკანა სავარძელში ისხდნენ, მომხდარის თვითმხილველნი გახდნენ.

ბლეიქის ცოლმა, ლაქუიშა ბუქერმა, ასევე, განაცხადა, რომ პოლიციელები სროლით მასაც დაემუქრნენ, როცა მან შვილების უსაფრთხოების უზრუნველყოფა მოითხოვა.

სროლაში მონაწილე ოფიცრები, ადმინისტრაციულ შვებულებაში გაუშვეს და მათი ვინაობა, ჯერჯერობით, არ დაუსახელებიათ.