ქართული ოცნების ვიცე-სპიკერის, გია ვოლსკის განცხადებით, 33 პოლიტიკური სუბიექტიდან რამდენიმე პარტია, ხოლო დანარჩენი პოლიტიკური ინდმეწარმეა. ვოლსკიმ აღნიშნული განცხადება 33 ოპოზიციური პარტიის მიერ ხმების დაცვის შესახებ მემორანდუმის გაფორმების თაობაზე გააკეთა.

"გასათვალისწინებელია, რომ ამ 33-დან რამდენიმე პარტიაა და დანარჩენი პოლიტიკური ინდმეწარმეა. რაოდენობით ბევრი ჩანან, ამით ხალხის ყურადღების მიპყრობა სურთ. მათ გამაერთიანებელი რაც აქვთ, ეს არის დესტრუქციის, არეულობის მცდელობა და ამას თავის განცხადებებშიც ადასტურებენ. ცალკეული მათგანი კრიზისთან დაკავშირებით თავისუფლად საუბრობს და მთავარი მიზანი და მისწრაფება პრაქტიკულად გამოდის, რომ სახელმწიფოში არ უნდა იყოს სტაბილური ხელისუფლება", — აცხადებს ვოლსკი.

ვოლსკის თქმით, ეს გაერთიანება არის პოლიტიკურ სუბიექტთა გაერთიანება, რომელიც ქვეყანას ჰპირდება დესტაბილიზაციას, დესტრუქციას და ის ღმერთს მადლობას უხდის, რომ ქართულ ოცნებას არ აქვს აუცილებლობა კოალიციურ შემადგენლობაში ჰყავდეს ასეთი პოლიტიკური სუბიექტები.

"თითოეული ხმის დასაცავად" — ამ მიზნითა და საარჩევნო მანიპულაციების გამოსარიცხად, ოპოზიციურმა პარტიებმა მემორანდუმს მოაწერეს ხელი. ოპოზიციაში აცხადებენ, რომ კოორდინირებულად იმუშავებენ ყველა ოლქში, მათ შორის იქაც, სადაც ერთმანეთს კონკურენტი დაუყენეს.

მათივე განცხადებით, ერთობლივად და შეთანხმებულად იმუშავებენ საერთაშორისო დამკვირვებლებთან, რათა არჩევნების ლეგიტიმურობის გარშემო არ გაჩნდეს კითხვის ნიშნები.