მცხეთის რაიონულ სასამართლოში გიორგი შაქარაშვილის საქმეზე 11 სრულწლოვანი ბრალდებულის სასამართლო პროცესი მიმდინარეობს. დღეს მათთვის შეფარდებული აღკვეთის ღონისძიება გადაისინჯება.

ადვოკატებმა ჟურნალისტებთან საუბრისას განაცხადეს, რომ აპირებენ რამდენიმე შუამდგომლობის დაყენებას, მათ შორის, აღკვეთი ღონისძიების გაუქმება ან გირაო.

"ამ შემთხვევაში ჩვენ ვიშუამდგომლებთ, რომ გაუქმდეს აღკვეთის ღონისძიება საერთოდ. ანუ ეს ნიშნავს, რომ არ არსებობს არანაირი საფუძველი, თუნდაც, ნაკლებად მძიმე აღკვეთის ღონისძიება იქნეს გამოყენებული. თუმცა. ალტერნატივას, რა თქმა უნდა, შევთავაზებთ სასამართლოს, გირაოს სახით და სისხლის სამართლის საპროცესო კოდექსი 199-ე მუხლის მეორე ნაწილის თანახმად სხვა ნებისმიერ გარემოებას, რომელსაც სასამართლო საჭიროდ ჩათვლის" — აცხადებს ვახტანგ ჩიქოვანის ადვოკატი არჩილ ბერიანიძე.

ირაკლი წაქაძის ადვოკატი, გაიოზ ჩარკვიანი ამბობს, რომ შუამდგომლობის სახით ისიც დააყენებს გირაოს და ეს იქნება ქონების უზრუნველყოფით 50 000 ლარი.

ამასთან, ბრალდებულების — ირაკლი წაქაძის, საბა ჩხარტიშვილისა და საბა გოგშელიძის ადვოკატები მოითხოვენ, მათი დაცვის ქვეშ მყოფების საქმის ცალკე წარმოებად გამოყოფას.

"მე მივმართე გენერალურ პროკურატურას სისხლის სამართლის საქმის ცალკე გამოყოფის მოთხოვნით, სამი პირის მიმართ, საბა ჩხარტიშვილი ერთ-ერთია მათ შორის. მათი ინტერესების დამცველებმაც, ვგულისხმობ წაქაძისა და გოგშელიძის ადვოკატებმაც, რამდენადაც ვიცი, მიმართეს აღნიშნული მოთხოვნით. არგუმენტებს მოგახსენებთ მას შემდეგ, რაც ჩაგვბარდება გადაწყვეტილება გამოყოფის თაობაზე. დღეის მდგომარეობით მიმართული გვაქვს დასაბუთებული არგუმენტებით, რადგან არსებობს საფუძველი აღნიშნული პირების საქმე ცალკე წარმოებად გამოიყოს", — აღნიშნავს დავით ჭიკაიძე.

რაც შეეხება პროკურორი დავით ყაზარაშვილის განცხადებას, მისი თქმით, იმ შემთხვევაში თუ ახალი გარემოებებით არ წარდგებიან ადვოკატები, პროკურატურა მათ შუამდგომლობას არ დააკმაყოფილებს.

"სისხლის სამართლის საპროცესო კოდექსი ითვალისწინებს აღკვეთის ღონისძიების გადასინჯვის ეტაპს. შესაბამისად, ამ ეტაპზე უნდა არსებობდეს რაიმე ახალი გარემეობა, რაიმე ახალი მტკიცებულება ან ინფორმაცია, რომელიც შესაძლებელია, რომ დაედოს აღკვეთის ღონისძიების გაუქმებას ან შეცვლას. ბრალდების მხარეს მიაჩნია, რომ არ არსებობს რაიმე ახლად გამოვლენილი გარემოება, რომელიც საფუძვლად დაედება აღკვეთის ღონისძიების გაუქმებას ან შეცვლას თერთმეტივე ბრალდებულის მიმართ", — აცხადებს პროკურორი.

რაც შეეხება საქმის ცალკე წარმოებით მოთხოვნას, პროკურორი აცხადებს, რომ ადვოკატებს უარი ეთქვათ, რადგან მისი თქმით, ეს გარემოება საქმის გაჭიანურებას ემსახურება.

"მიგვაჩნია, რომ დღეის მდგომარეობით არარელევანტურია აღნიშნული საკითხი. როგორც ცემის ფაქტები, ასევე თავდასხმის ფაქტები დაკავშირებულია ერთმანეთთან, ამიტომ ამ ეტაპზე არ მიგვაჩნია მიზანშეწონილად, რომ გამოიყოს აღნიშნული საქმე" — აღნიშნა ბრალდების მხარემ.

შაქრაშვილის საქმეზე ბრალდებული 11 სრულწლოვანი პირის საქმე ცალკე წარმოებად არის გამოყოფილი. ბრალდებულებს: ვახტანგ ჩიქოვანს, ვასილ მახარაძეს, არჩილ გაგნიძეს, ნიკა რევაზიშვილს, გიგა ტატიაშვილს, თენგიზ ბარბაქაძეს, ნიკა ჟვანიას, ირაკლი მუმლაძეს, საბა ჩხარტიშვილს, ირაკლი წაქაძესა და საბა გოგშელიძეს გამოძიება ედავება ჯგუფური ძალადობის ორგანიზებას, მასში მონაწილეობასა და თავისუფლების უკანონო აღკვეთას.

მათგანს სამს — ვახტანგ ჩიქოვანს, ნიკა რევაზიშვილსა და არჩილ გაგნიძეს, ასევე, 2 არასრულწლოვანს ბრალდებულს ზ.ხ.-სა და ა.ქ.-ს 11 აგვისტოს პროკურატურამ ბრალი დაუმძიმა. გამოძიება მათ დამამძიმებელ გარემოებებში ჩადენილ განზრახ მკვლელობას ედავება. პროკურატურის ვერსიით, მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.