მაჟორიტარი დეპუტატი კახა ოქრიაშვილი ნაციონალური მოძრაობის ლიდერებს შეხვდა. სოციალურ ქსელში გავრცელდა ფოტო, სადაც ის დიმიტრი შაშკინთან და ვანო მერაბიშვილთან ერთად იმყოფება.

On.ge-ს კითხვაზე, ნიშნავს თუ არა ეს, რომ ნაციონალურ მოძრაობასთან თანამშრომლობას იწყებს, ოქრიაშვილი პასუხობს, რომ მისი მიზანია დაამარცხოს ოცნების კანდიდატი და "ეს არის მთელი ისტორია".

"ჩვენ ჩამოვაყალიბეთ პარტია, მე და ცეზარ ჩოჩელმა. მე ვიყრი კენჭს ამ პარტიიდან დმანისი-ბოლნისი-თეთრიწყაროს სამაჟორიტარო ოლქში. გასულ კვირას ვაწარმოებდი მოლაპარაკებებს ოპოზიციურ პარტიებთან, თითქმის ყველა ოპოზიციურ პარტიასთან მქონდა შეხვედრა, რათა შევჯერებულიყავით ჩემს კანდიდატურაზე, რომ არ დამიყენონ კონკურენტები, — განაცხადა მან.

კითხვაზე, რას ფიქრობს ვანო მერაბიშვილზე, როგორ პოლიტიკოსზე, ოქრიაშვილი პასუხობს:

"არანაირი დამოკიდებულება არა მაქვს, არსებობს ნაციონალური მოძრაობა და ნაციონალურ მოძრაობაში არის ხალხი. მოცემულობა არის ასეთი, არსებობს პარტიები, რომლებსაც აქვთ რეიტინგი, რომლებსაც საქართველოს მოსახლეობა აძლევს ხმებს. ნაციონალურ მოძრაობას დაახლოებით 37-38% აქვს აღებული ბოლო არჩევნებში, ეს არის მოცემულობა ხალხნო".

კახაბერ ოქრიაშვილი 2004 წლიდან საქართველოს პარლამენტის დეპუტატია. ის საკანონმდებლო ორგანოში ოთხჯერ მოხვდა, ოთხივეჯერ მაჟორიტარულის სიტემით, თუმცა სხვადასხვა პარტიის წარდგინებით.

2016 წლამდე ოქრიაშვილი ნაციონალური მოძრაობის დეპუტატი იყო, შემდეგ კი კურსი შეიცვალა და ქართულ ოცნებაში გადავიდა. ის ოცნების მაჟორიტარად გიორგი კვირიკაშვილმა წარადგინა

ოქრიაშვილი პროფესიით ექიმი და ბიზნესმენია. მან დაარსა ფარმაცევტული კომპანია PSP.