შინაგან საქმეთა სამინისტროს ინფორმაციით, დააკავეს 5 პირი, რომლებმაც კაცს ფიზიკური შეურაცხყოფა მიაყენეს და ცივი იარაღის მუქარით თავისუფლება უკანონოდ აღუკვეთეს. უწყების განცხადებით, წარსულში ნასამართლევმა პირებმა, შურისძიების მოტივით, კაცს თბილისში, მისსავე საცხოვრებელ სახლში სცემეს და ავტომობილით ქობულეთში ჩაიყვანეს.

შსს-ში ამბობენ, რომ ბრალდებულებმა კაცი ქობულეთიდან სოფელ კვირიკეს მიმართულებით სხვა ავტომობილით წაიყვანეს, რა დროსაც ისინი სამართალდამცავებმა გააჩერეს და ადგილზე დააკავეს. უწყების განცხადებით, ორივე ავტომობილი, ასევე დანაშაულის ჩადენის იარაღი — დანა ნივთმტკიცების სახით ამოიღეს.

წინასწარი შეთანხმებით ჯგუფის მიერ სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით ჩადენილ თავისუფლების უკანონო აღკვეთის საქმეზე გამოძიება საქართველოს სისხლის სამართლის კოდექსის 143-ე მუხლის მესამე ნაწილის "ა" და "ე"ქვეპუნქტით მიმდინარეობს.