საქართველოს პრემიერმინისტრის, გიორგი გახარიას განცხადებით, აგროდაზღვევის პროგრამა არა მხოლოდ მიღებული მოსავლის რისკს დაფარავს, არამედ ნერგებზეც, მათ შორის ვაზზეც გავრცელდება.

"გარდა იმისა, რომ ჩვენს ფერმერები ჯერ კიდევ სჭირდებათ აგიტაცია, რომ მეტი მონაწილეობა მიიღონ და ისარგებლონ ამ პროგრამით, მთავარი ისაა, რომ ეს [აგროდაზღვევის] პროგრამა არ ფარავდა ნერგებს, ფარავდა მიღებული მოსავლის რისკს. ბევრ ჩვენს ფერმერს უბრალოდ გაუნადგურდა ნერგები და მივიღეთ გადაწყვეტილება, რომ პროგრამის ფარგლებში გაჩნდება ახალი, დამატებითი პროგრამა, რომელიც მისცემს შესაძლებლობას ქართველ ფერმერს, რომელსაც სტიქიის გამო დაუზიანდა ან გაუნადგურდა ნერგები, მიიღოს სახელმწიფოსგან დახმარების სახით ახალი, უფრო ხარისხიანი ნერგები იმისთვის, რომ მან აღადგინოს თავისი მრავალწლოვანი ბაღები", — განაცხადა გახარიამ მთავრობის სხდომაზე.

მისივე თქმით, პროგრამა შეეხება ვაზსაც. საქართველოს სოფლის მეურნეობის მინისტრის, ლევან დავითაშვილის განმარტებით, ახალი კომპონენტი დროში შეზღუდული არ არის და ყველა რეგიონში იმუშავებს, ამასთან, სახელმწიფო, ფაქტობრივად, 100-ვე პროცენტით აანაზღაურებს ახალი ნერგების შეძენას.

დავითაშვილის განცხადების თანახმად, განსაკუთრებული მოქნილობა ეძლევათ ფერმერებს იმ შემთხვევაში, თუ ისინი გადაწყვეტენ რომ ესა თუ ის კულტურა ჩაანაცვლონ სხვა კულტურით.

"მათ ეძლევათ საშუალება, რომ ახალი კულტურის ბაღები გააშენონ. სახელმწიფო სრულად დაფარავს ნერგის ღირებულებას, ეს ეხება როგორც მრავალწლიან, ისე ვენახებს ყველა მიმართულებით, გარდა რქაწითელისა", — თქვა მან.

მინისტრის ინფორმაციით, ბოლო წლებში სახელმწიფოს უწევს რქაწითელის ინტენსიური სუბსიდირება, ვინაიდან ბაზარზე ის ჭარბად იწარმოება.

"საშუალება ეძლევათ ფერმერებს, რომ ამ კულტურის სხვა ჯიშების ჩანაცვლება მოახდინონ, რომელიც უფრო მეტად შეიძლება კომერციულად საინტერესო იყოს, მეტი ღირებულება ჰქონდეს", — აცხადებს დავითაშვილი.

მისივე თქმით, მაქსიმალური ფართობი, რასაც სახელმწიფო დაფარავს, 50 ჰექტარი იქნება.

რაც შეეხება პროგრამის ბენეფიციარებს, ეს შეეხება ყველას, ვისაც მოსავალი ან ნერგები 2020 წლის 15 ივლისის შემდგომ დაუზარალდა.