ამერიკელმა მომღერალმა, ბილი აილიშმა, ივლისის ბოლოს თვითიზოლაციაში დაწერილი სიმღერა, my future, გამოუშვა. იგი აილიშის მიერ 2020 წელს გამოშვებული რიგით მეორე სიმღერაა გერმანელ კომპოზიტორთან, ჰანს ციმერთან ერთად ჯეიმს ბონდისთვის დაწერილი საუნდტრეკის, No Time To Die, შემდეგ. my future გამოსვლისთანავე გახდა ბილბორდის Hot Rock & Alternative Songs ჩარტის ლიდერი.

ბილის თქმით, სიმღერა "მარტოობაში საკუთარი თავის ძიებას" ეძღვნება, ახლა კი ახალგაზრდა მომღერალმა ფანებსაც მისცა საკუთარი თავის აღმოჩენის შესაძლებლობა.

Spotify-სთან თანამშრომლობით, აილიშმა ვებგვერდი, "წერილი მომავალში მყოფ შენს თავს" შექმნა. "დაწერე წერილი და გაუგზავნე ვარსკვლავებს. იგი მომავალში დაგიბრუნდება", — ესალმება წარწერა ვებგვერდის სტუმარს.

გვერდზე სიმღერის ვიდეოში გამოყენებული ანიმაციური სურათი ჩანს, სადაც ბილი ვარსკვლავებს უყურებს. მისი ავტორი ენდრიუ ონორატოა.

წერილის დაწერის და მისი გაგზავნის შემდეგ ცა ნათდება, გვერდზე კი წარწერა ჩნდება: "რამდენიმე წელიწადში გნახავ".

რადგან მე შეყვარებული ვარ ჩემს მომავალზე.
ერთი სული მაქვს, როდის შევხვდები.
მე შეყვარებული ვარ სხვა არავისზე.
მხოლოდ საკუთარი თავის შეცნობა მსურს.

ბილი აილიში, my future

ვებგვერდი ინტერნეტმომხმარებლებისთვის ორი თვის განმავლობაში იქნება ხელმისაწვდომი.

სასხვათაშორისოდ, უნდა აღინიშნოს, რომ მსგავსი უჩვეულო გამოცდილება ქართული რეალობისთვისაც არაა უცხო. უკვე წლებია, არსებობს ვებგვერდი მომავალი.მე, რომელიც ასევე გთავაზობთ, რომ საკუთარ თავს მისწეროთ წერილი მომავალში. უფასო სერვისის საშუალებით თქვენ თავად ირჩევთ თარიღს — როდის გსურთ წარსულიდან გამოგზავნილი წერილის მიღება ელფოსტაზე. ელფოსტის მისამართები კონფიდენციალურია და არც სპამის გამოგზავნის საშიშროება არსებობს.

ამ დრომდე ქართულ გვერდზე 23 ათასზე მეტი წერილია მომავალში გაგზავნილი. მათი ნაწილი, გამგზავნის სურვილით, საჯაროა და წაკითხვა თავადაც შეგიძლიათ.