Facebook ნელ-ნელა იუსტიციის სახლს ემსგავსება, ანუ ყველაფერი, რასაც ინტერნეტი გვთავაზობს, ან ერთ სივრცეში იყრის თავს ან მარკ ცუკერბერგის შვილობილ კომპანიებში, რომლებსაც ინტერნეტგიგანტი ყიდულობს - მაგალითად, Instagram, Whatsapp, MSQRD და ა.შ.

ახლახან ცნობილი გახდა, რომ ფეისბუქი ახალი პლატფორმის შექმნას გეგმავს, ოღონდ არსებული ქსელის ფარგლებში.

სილიკონ ველის გოლიათს ვიდეოკონტენტის ბაზარზე შემოსვლა უნდა და აპირებს, გლობალურად ითანამშრომლოს ასეთი მასალის შემქმნელებთან. სულ მალე შესაძლოა ფეისბუქზე ისეთივე ორიგინალური და ექსკლუზიური შოუები ვიხილოთ, როგორებიც ნეტფლიქსსა და ამაზონზე გვხვდება.

სოციალურ ქსელში მალე დაინერგება ახალი ვიდეო ტაბი, რომელიც სწორედ ამ ტიპის კონტენტისთვის იქნება გამოყოფილი. ასევე ცნობილია, რომ ცუკერბერგის კომპანია რამდენიმე პოტენციურ პარტნიორთან მოლაპარაკებებს უკვე აწარმოებს.