ევროპული საქართველოს წევრის, გიორგი კანდელაკის განცხადებით, მაშინ როცა მესტიაში
მყოფი მოქალაქეები იძულებით კარანტინში გადაიყვანეს, სოზარ სუბარის
პრივილეგირებულ მდგომარეობაში ჩაყენება უსამართლო და გაუგებარია.

"თუკი სოზარ სუბარს შეუძლია გაიკეთოს ტესტი, რატომ არ შეუძლიათ იმ მოქალაქეებს, ვინც ასევე იმყოფებოდნენ მესტიაში? ან რატომ არ შეიძლება, რომ ამ მოქალაქეებს ჩაუტარდეთ რეგულარული ტესტები და მათ მიმართ იყოს იგივე მიდგომა, რაც ბიზნეს ვიზიტორების მიმართ, რომლებიც თავსდებიან 24-საათიან კარანტინში ტესტის პასუხამდე?", — აცახდებს კანდელაკი.

დეპუტატი კიდევ ერთხელ მიუთითებს დავით ზალკალიანზე, რომელსაც ე.წ. მწვანე ქვეყნების სიაში არმყოფ ბელგიაში ვიზიტის შემდეგ კარანტინი არ გაუვლია. კანდელაკი აღნიშნავს, რომ დისკრიმინაციულია, როცა ამის მიუხედავად, უსაფრთხო ქვეყნებიდან შემოსული საქართველოს მოქალაქეები კარანტინში გადაჰყავთ.

(აღნიშნულ საკითხს მაშინ დავით ზალკალიანიც გამოეხმაურა და განაცხადა, რომ მას და დელეგაციის სრულ შემადგენლობას PCR კვლევა ჩაუტარდა და შედეგები უარყოფითია. მინისტრი ეყრდნობოდა საქართველოს მთავრობის 332-ე დადგენილების 11(1) მუხლის "ბ" პუნქტს, რომლის მიხედვით, ვიზიტიდან დაბრუნებული დელეგაციის წევრები ვალდებულნი არიან, საქართველოში შემოსვლიდან 14 დღის განმავლობაში ყოველ 72 საათში ჩაიტარონ PCR კვლევა).

კორონავირუსის ახალი დადასტურებული შემთხვევების გამო, მესტიაში შესვლა და გამოსვლა იზღუდება. ამას პოლიცია აკონტროლებს. დაბა მესტიაში, უშგულსა და ლენჯერში ფუნქციონირების უფლება ექნებათ მხოლოდ აფთიაქებს, საბანკო დაწესებულებებს, სასურსათო მაღაზიებსა და ღია ტიპის საკვებ დაწესებულებებს.