საქართველოს საგარეო საქმეთა მინისტრი, დავით ზალკალიანი განმარტავს, რატომ არ იმყოფება კარანტინში ბრიუსელიდან დაბრუნების შემდეგ. მან ამ თემაზე ფეისბუქის საკუთარ გვერდზე პოსტი დაწერა, რომელიც იწყება სიტყვებით:

"მინდა დაგამშვიდოთ, არ ინერვიულოთ და გაეცნოთ!".

მისივე ინფორმაციით, ბრიუსელიდან დაბრუნებისთანავე მას და დელეგაციის სრულ შემადგენლობას PCR კვლევა ჩაუტარდა და კვლევის შედეგები უარყოფითია.

მინისტრი ეყრდნობა საქართველოს მთავრობის 332-ე დადგენილების 11(1) მუხლის "ბ" პუნქტს, რომელიც საქართველოს სამთავრობო და საპრეზიდენტო დელეგაციების უცხო ქვეყანაში ოფიციალური ვიზიტებიდან დაბრუნების წესს ადგენს. დადგენილების მიხედვით, ვიზიტიდან დაბრუნებული დელეგაციის წევრები ვალდებულნი არიან, საქართველოში შემოსვლიდან 14 დღის განმავლობაში ყოველ 72 საათში ჩაიტარონ PCR კვლევა.

ზალკალიანის ინფორმაციით, 2020 წლის 13-14 ივლისს ოფიციალური ვიზიტით იმყოფებოდა ბრიუსელში, სადაც შეხვედრები გაიმართა ნატო-სა და ევროკავშირში.

"აღნიშნული ვიზიტი თავისი შინაარსით გახლდათ ძალზედ მნიშვნელოვანი და დატვირთული. საქართველოს დელეგაციამ, ალიანსის მიწვევით მონაწილეობა მიიღო ნატო-საქართველოს კომისიაში, გაიმართა შეხვედრა ნატო-ს გენერალური მდივნის მოადგილესთან, რომელიც იმ დროს ასრულებდა გენერალური მდივნის ფუნქციას, ასევე შეხვედრები გაიმართა ევროკომისიაში და ევროპარლამენტში. თავად ის ფაქტი, რომ გლობალური პანდემიის პირობებში, ალიანსმა მიიღო გადაწყვეტილება ნატო-საქართველოს კომისიის ფიზიკური დასწრებით გამართვის თაობაზე და აღნიშნულ სხდომაზე მიიწვიეს საგარეო საქმეთა მინისტრი, კიდევ ერთხელ ადასტურებს ალიანსთან საქართველოს მჭიდრო პარტნიორობას და იმ აქტიურ მუშაობას, რასაც ხელისუფლება საგარეო პოლიტიკური მიმართულებით ახორციელებს. მოხარულები ვართ, რომ კომისიის სხდომამ უაღრესად პოზიტიურად ჩაიარა და ჩვენმა ქვეყანამ მოკავშირეების მხრიდან კვლავ დაიმსახურა მაღალი შეფასებები", — წერს მინისტრი.

ამასთან, ზალკალიანი აღნიშნავს, რომ საგარეო საქმეთა მინისტრი და მთლიანად უწყება "უდიდესი პასუხისმგებლობით უდგება" არსებული რეკომენდაციების დაცვას, რაც მიმართულია მოსახლეობის ჯანმრთელობის და მათი უსაფრთხოების უზრუნველსაყოფად.

"სამწუხაროა, რომ ცალკეული პოლიტიკოსების მხრიდან, მიუხედავად იმისა, რომ მათ ძალიან კარგად იციან დადგენილების აღნიშნული რედაქცია, კვლავ აქვს ადგილი საზოგადოების შეცდომაში შეყვანის მცდელობას და ამ თემით სპეკულაციას, ხოლო იმ შემთხვევაში თუ არ ეცნობიან შესაბამის საკანონმდებლო აქტებს, ეს კიდევ უფრო მეტად მიუთითებს კანონმდებლობის მიმართ მათ არაკეთილსინდისიერ დამოკიდებულებაზე", — აღნიშნავს ის.

14 ივლისს ბრიუსელიდან ჩამოსული მინისტრი 16 ივლისს მთავრობის სხდომაზე იმყოფებოდა. ევროპული საქართველოს დეპუტატი, გიორგი კანდელაკი დაინტერესდა მთავრობის განმარტებით, რატომ არ გაიარა მინისტრმა სავალდებულო კარანტინი.

საქართველოს მთავრობას ბელგია ე.წ. მწვანე ქვეყნების სიაში შეყვანილი არ ჰყავს. ამასთან, უცხოეთიდან დაბრუნებული საქართველოს მოქალაქე ნებისმიერ შემთხვევაში 2-კვირიან სავალდებულო კარანტინს გადის.

აღსანიშნავია ისიც, რომ არსებობს შემთხვევა, როცა ხელისუფლების წარმომადგენელი კარანტინში იყო. კონსულტაციებისთვის უკრაინიდან ჩამოსულმა ელჩმა, თეიმურაზ შარაშენიძემ კარანტინი გაიარა.