როგორც იქნა, FX-მა გაგვიმხილა, თუ როდის შევძლებთ მისი გახმაურებული სატელევიზიო შოუს — Fargo-ს ახალი სეზონის ხილვას.

Deadline-ის ცნობით, მეოთხე სეზონის პრემიერა 27 სექტემბერს შედგება და მაყურებელს ერთდროულად პირველი ორი ეპიზოდის ნახვის შესაძლებლობა ექნება. ახალ სეზონში სულ 11 სერია იქნება და ორეპიზოდიანი პრემიერის შემდეგ კვირაში ერთხელ თითო სერია გამოვა.

ახალ სეზონში სიუჟეტი 1950-იანი წლების ამერიკაში, მისურის შტატში ვითარდება, სადაც ემიგრანტების ორი ჯგუფი — იტალიელები და აფროამერიკელები კრიმინალური გარჩევებით ერთმანეთს უპირისპირდებიან.

ივლისის ბოლო სერიალის ახალი ტიზერიც გავრცელდა, რომელიც ამ შოუს გულმხურვალე ფანებს დაუვიწყარ სანახაობას ჰპირდება:

ამ სეზონის პრემიერა თავდაპირველად აპრილში იყი დაგეგმილი, თუმცა კორონავირუსის პანდემიის გამო სხვა მრავალი პროექტის მსგავსად, მისი გამოსვლის თარიღიც შეიცვალა.

ანთოლოგიური ტიპის ამ სატელევიზიო შოუს ახალი სეზონის სამსახიობო გუნდი დაკომპლექტებულია ისეთი სახეებით, როგორებიც არიან მუსიკოსი და მსახიობი ჯეისონ შვარცმენი, კრის როკი, ენ უიშოუ, ჯესი ბაკლი, ჯეკ ჰასტონი, ენდიუ ბერდი, გაეტანო ბრუნო, ჯერემი ჰარისი და სხვა.

Fargo ერთ-ერთი ყველაზე ცნობილი კრიმინალური ჟანრის სატელევიზიო შოუა, რომელმაც მისთვის დამახასიათებელი დახვეწილი შავი იუმორით მრავალი მაყურებელი მოხიბლა. სერიალის პირველი სეზონი ტელეეკრანებზე 2014 წელს გამოჩნდა და მაშინვე დიდი მოწონება დაიმსახურა.

FX-ის ეს ცნობილი სერიალი ძმები კოენების ამავე სახელწოდების მქონე 1996 წელს გამოსული ფილმის შთაგონებით შეიქმნა. ძმები კოენები ამავდროულად სერიალის აღმასრულებელი პროდიუსერები არიან.

ისღა დაგვრჩენია, შემოდგომის სეზონს დაველოდოთ და ვნახოთ, ამჯერად რა აბსურდილი ისტორია გააცოცხლეს შოუს შექმნელებმა დახვეწილი იუმორის საშუალებით.