შინდისის ტრაგედიიდან 12 წელი გავიდა. თავდაცვის მინისტრი, ირაკლი ღარიბაშვილი გმირთა მემორიალს ესტუმრა და დაღუპულთა ხსოვნას პატივი მიაგო.

"შინდისის ბრძოლა არის მართლაც ჩვენი თანამედროვე ისტორიაში ერთ-ერთი გამორჩეული და შთამბეჭდავი თავგანწირვისა და გმირობის ისტორია. ჩვენ აქ შევიკრიბეთ იმისთვის, რომ პატივი მივაგოთ ჩვენი დაღუპული გმირების ხსოვნას, ჩვენ ქედს ვიხრით მათი დიდების და სულების წინაშე", — განაცხადა მინისტრმა.

მან ასევე, მადლობა გადაუხადა დაღუპული გმირების მშობლებს და აღნიშნა, რომ ეს არის ის მაგალითი, რომელზეც თაობები უნდა აღიზარდოს.

"მათ მშობლებს კიდევ ერთხელ მადლობას ვეუბნებით, რომ ასეთი გმირები აჩუქეს და აღუზარდეს ჩვენს სამშობლოს. ეს არის ის გმირობის მაგალითი, რომელზეც ჩვენი შვილები უნდა აღიზარდონ და სწორედ ამ 17-მა ვაჟკაცმა აჩვენა სამაგალითო თავგანწირვა და გმირობა", — აღნიშნა თავდაცვის მინისტრმა.

შინდისის ბრძოლა 2008 წლის 11 აგვისტოს მოხდა. რუსულ სამხედრო ნაწილთან შეტაკების დროს 17 ქართველი ჯარისკაცი დაიღუპა: ალექსანდრე ონიანი, ნიკოლოზ ფორჩხიძე, ზვიად კაცაძე, ემზარ წილოსანი, ილია შეყლაშვილი, ფელიქს კაკაურიძე, ირაკლი ჯანელიძე, თეიმურაზ ბერიძე, კახა კოშაძე, ლევან მელქაძე, მარლენ ბარამია, ვეფხვია ჯიშკარიანი, მიხეილ დვალიშვილი, რომან ზოიძე, რუსლან წულაძე, ილია გაბუნია და შმაგი კუპატაძე.

ასევე წაიკითხეთ: