ნაციონალური მოძრაობის ერთ-ერთი ლიდერის, ხატია დეკანოიძის თქმით, ზურაბ ჯაფარიძის დიდუბე-ჩუღურეთის ოლქში მხარდასაჭერად ოპოზიციის საერთო გადაწყვეტილებას დაელოდებან.

როგორც ხატია დეკანოიძემ On.ge-ს უთხრა, ნაციონალურ მოძრაობას და გირჩს ბევრ საკითხებზე აქვს კონსულტაციები და ჯაფარიძის ოპოზიციის საერთო კანდიდატად წარგენის შემთხვევაში, დიდი ალბათობით, მას მხარს დაუჭერენ.

"მე პირადად ნამდვილად მომწონს ზურაბ ჯაფარიძის კანდიდატურა. ძალიან დიდი კონტრასტია კომპარტიის წარმომადგენელ გია ვოლსკისა და ზურას შორის. ჩვენ გირჩთან მუდმივად გვაქვს კონსულტაციები, არამხოლოდ მაჟორიტარულ ოლქებზე, სხვა ჭრილშიც მუდმივად განვიხილავთ ძალიან ბევრ საკითხებს", — ამბობს ის.

დეკანოიძის ინფორმაციით, ოპოზიციის გადაწყვეტილება ზურაბ ჯაფარიძესთან დაკავშირებით პარასკევს, 14 აგვისტოს გახდება ცნობილი.

"ჩვენც ახლა ვმსჯელობთ, ამ ერთიანი გადაწყვეტილების შემდეგ, როგორი კონფიგურაცია წარსდგება და დიდი ალბათობით, არ არის გამორიცხული მხარი დავუჭიროთ ზურას კანდიდატურას", — აღნიშნავს ის.

დღეს, 10 აგვისტოს გირჩის ლიდერმა, ზურაბ ჯაფარიძემ განაცხადა, რომ დიდუბე-ჩუღურეთში მაჟორიტარად იყრის კენჭს. მისი თქმით, კანდიდატურის წარდგენიამდე მას წინასწარი კონსულტაციები რამდენიმე ოპოზიციური პარტიის ლიდერთან ჰქონდა, რომლებმაც კენთილგანწყობა დაუდასტურეს. მას იმედი აქვს, რომ ეს კეთილგანწყობა პოლიტიკურ მხარდაჭერაში გადაიზრდება.

ევროპული საქართველოს ლიდერმა, გიგი უგულავამ განაცხადა, რომ ისინი მზად არიან ზურაბ ჯაფარიძე ოპოზიციის მაჟორიტარობის ერთიანი კანდიდატი იყოს.

დიდუბის მაჟორიტარულ ოლქში ქართული ოცნების კანდიდატი გიორგი ვოლსკია.

რაც შეეხება სხვა ოლქებს, ოპოზიცია თბილისის მაჟორიტარობის კანდიდატებზე აქამდე შეთანხმდა, ხოლო რეგიონებში ყველა პარტიას თავისი კანდიდატი ეყოლება. თბილისში ადგილები ასე გადანაწილდა:

  • ვაკე — ელენე ხოშტარია;
  • გლდანი — ნიკა მელია;
  • ისანი — გიორგი ვაშაძე;
  • სამგორი — ლევან ხაბეიშვილი;
  • მთაწმინდა და კრწანისი — შალვა შავგულიძე;
  • ნაძალადევი — შალვა ნათელაშვილი.

თბილისში სულ 8 მაჟორიტარული ოლქია. ოპოზიციას, ზურაბ ჯაფარიძის ჩათვლით, უკვე ჰყავს 7 კანდიდატი. ამ დრომდე ღიად რჩება საბურთალოზე საერთო კანდიდატის საკითხი. ცნობილია, რომ ქართული ოცნებიდან იქ დეპუტატობისთვის დავით სერგეენკო იბრძოლებს, ლელოდან ბადრი ჯაფარიძე. ამასთან, კანდიდატი იქნება ალეკო ელისაშვილიც.

2020 წლის საპარლამენტო არჩევნები ოქტომბერში ჩატარდება. 8 მარტის შეთანხმების შედეგად, წელს ახალი სისყემა, 120/30 ჩატარდება, რომლის მიხედვით, პარლამენტში 120 დეპუტატი შევა პარტიული სიით, ხოლო 30 მაჟორიტარულად.