საქართველოს პრეზიდენტ სალომე ზურაბიშვილის განცხადებით, ომში დაღუპულმა გმირებმა სამშობლოსა და ღირსეულ საქართველოს შესწირეს თავი და "თუ დავფიქრდებით", დღეს "საქართველო არ არის ღირსეული"

"ჩვენ დღეს პატივს ვცემთ ჩვენს გმირებს. დღეს არის დუმილის და დაფიქრების დღე. თუ დავფიქრდებით, დღეს რაც ხდება საქართველოში, არის სირცხვილი. ეს ადამიანები სამშობლოსთვის შესწირეს თავი, ღირსეულ საქართველოსთვის და დღეს საქართველო არ არის ღირსეული. ის შიდა დაპირისპირება, რაც არსებობს, ის შიდა ბოღმა, სიძულვილი, რომელსაც ყოველდღიურად გამოქვს შედეგი ჩვენს ახალგაზრდობაზე, ამას ვხედავთ ჩვენ. ეს არის მათი არაპატივისცემა", — თქვა ზურაბიშვილმა მუხათგვერდის სასაფლაოზე, სადაც აგვისტოს ომში დაღუპული გმირების ხსოვნისთვის პატივის მისაგებად იმყოფებოდა.

მან ასევე აღნიშნა, რომ "ომმა ვერ დაგვამარცხა" და ოკუპირებული ტერიტორიების მიუხედავად, ჩვენ ვართ "ძლიერი, დემოკრატიული, თავისუფალი და დამოუკიდებელი ქვეყანა". პრეზიდენტი ამბობს, რომ ამას ის საერთაშორისო გამოხმაურებებიც ადასტურებს, რაც ქვეყანამ ამ დღეების მანძილზე მიიღო.

"მათ არ ავიწყდებათ, რაც მოხდა; არ ეგუებიან ისე, როგორც არ ვეგუებით ჩვენ და ეს არის ჩვენი მთავარი გამარჯვება".

აგვისტოს ომის დაწყებიდან 12 წელი გავიდა. 2008 წლის აგვისტოში რუსეთი საქართველოს ტერიტორიაზე შემოიჭრა, ცეცხლი გაუხსნა ქართულ სოფლებს, დაიკავა როკის გვირაბი. საქართველომ რუსულ აგრესიას უპასუხა. ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა.

ჯანდაცვის სამინისტროს მონაცემებით, დაჭრილ/დაშავებულ სამოქალაქო და სამხედრო პირთა რაოდენობა სულ 2 232 პირს შეადგენს. მათ შორის, 1045 სამხედრო მოსამსახურე იყო.

IDFI-ის ინფორმაციით, აგვისტოს ომის შემდეგ, საქართველოში 263 598-მდე გაიზარდა დევნილთა რაოდენობა. 2009-2015 წლებში კი, საცხოვრებელი ფართი საკუთრებაში გადაეცა ჯამში 18 679 ოჯახს.

2008 წლის 12 აგვისტოს ცეცხლის შეწყვეტის შეთანხმებით აღებული ვალდებულებების მიუხედავად, რუსეთი კვლავ აგრძელებს სუვერენული და დამოუკიდებელი სახელმწიფოს რეგიონების უკანონო ოკუპაციას, საერთაშორისო სამართლის უგულებელყოფით. საოკუპაციო ხაზთან კვლავ არსებობს საქართველოს მოქალაქეების გატაცებებისა და უკანონო დაკავებების ფაქტები. ასევე, საოკუპაციო ხაზის გასწვრივ განლაგებულია მავთულხლართები და ე.წ. საზღვრის აღმნიშვნელი ნიშნები.