იუსტიციის მინისტრი თეა წულუკიანი მიხეილ სააკაშვილის განცხადებაზე პასუხად, რომლის მიხედვითაც, ექსპრეზიდენტი საარჩევნო კამპანიაში აქტიურად იქნება ჩართული, აცხადებს, რომ მიხეილ სააკაშვილი არასდროს ყოფილა რეფორმატორი და იგი "ღამურას დაემსგავსა".

"მიხეილ სააკაშვილი ქვეყნის შიგნით განაჩენებით დადასტურებული კრიმინალია და ქვეყნის გარეთ უკვე რასაც მისი განცხადებებიც მოწმობს, დაემსგავსა ღამურას. ის აქაურიც ვეღარ არის, ცდილობს, აქ ფეხი ისევ მოიკიდოს, რისი პოლიტიკური რესურსი და შანსი მას არ გააჩნია და იმ ქვეყნებში, სადაც ჩაივლის ხოლმე, რა თქმა უნდა, ფეხს ვერ იკიდებს, რადგან ის არც არასდროს არ ყოფილა რეფორმატორი", — აცხადებს წულუკიანი.

იუსტიციის მინისტრის თქმით, ქართულ ოცნებას საკუთარი დღის წესრიგი აქვს და ემზადება მაღალი ხარისხის არჩევნების ჩასატარებლად.

გუშინ, 4 აგვისტოს, მიხეილ სააკაშვილმა TV პირველის ეთერში მომავალ არჩევნებზე ისაუბრა და აღნიშნა, რომ მისი ფიგურა, როგორც ივანიშვილს სურდა, არ გაქრება ევროპის რადარებიდან.