საქართველოს სახალხო დამცველის აპარატმა 2016 წლის თებერვლიდან საქართველოში ქმედუნარიანობის ინსტიტუტის რეფორმის მიმდინარეობის შესწავლა დაიწყო. ომბუდსმენის პრესსამსახურის მიერ გავრცელებული ცნობით, კვლევის მიზანია შეფასდეს საქართველოში არსებული ქმედუნარიანობის ინსტიტუტის შესაბამისობა „შეზღუდული შესაძლებლობის მქონე პირთა უფლებების შესახებ“ გაეროს კონვენციით დადგენილ სტანდარტთან.

"ქმედუნარიანობის ინსტიტუტის კვლევის ფარგლებში შეფასდება როგორც მოქმედი საკანონმდებლო ჩარჩო, ისე მისი დანერგვის პროცესი. ნორმატიულ აქტებთან ერთად, კვლევა შეისწავლის საქართველოს საერთო სასამართლოების მიერ მიღებულ გადაწყვეტილებებს, ექსპერტიზის ბიუროს მიერ პირის უფლებების შეზღუდვასთან დაკავშირებით გაცემულ დასკვნებს და მათ შესაბამისობას, როგორც კანონმდებლობასთან, ისე კონვენციასა და საკონსტიტუციო სასამართლოს გადაწყვეტილებასთან", - აცხადებს სახალხო დამცველი.

ომბუდსმენის ოფისის ცნობით, საქართველოს საკონსტიტუციო სასამართლომ 2014 წლის 8 ოქტომბერს გამოიტანა გადაწყვეტილება საქმეზე საქართველოს მოქალაქეები - ირაკლი ქემოკლიძე და დავით ხარაძე საქართველოს პარლამენტის წინააღმდეგ, რომლითაც არაკონსტიტუციურად ცნო საქართველოში მაშინ მოქმედი ქმედუუნარობის ინსტიტუტი. 2015 წლის 20 მარტს საქართველოს პარლამენტმა მიიღო ცვლილებების პაკეტი, რომელიც სასამართლოს გადაწყვეტილების იმპლემენტაციას ემსახურებოდა. საკანონმდებლო ცვლილებები ძალაში 2015 წლის 1 აპრილიდან შევიდა.

როგორც სახალხო დამცველის ოფისი აცხადებს, კვლევა ხუთი თვის განმავლობაში გაგრძელდება და მას სახალხო დამცველის აპარატის შშმ პირთა უფლებების დეპარტამენტთან თანამშრომლობით, „შეზღუდული შესაძლებლობის მქონე პირთა უფლებების კონვენციის“ მონიტორინგის ჯგუფის წევრი და ილიას სახელმწიფო უნივერსიტეტის ასოცირებული პროფესორი ვახუშტი მენაბდე ჩაატარებს.