კორონავირუსის პანდემიის გამო მსოფლიოს მრავალ კუთხეში მილიონობით ადამიანმა ათეულობით დღე თვითიზოლაციაში ან იძულებით კარანტინში გაატარა, რის გამოც გასული თვეების განმავლობაში ყველაზე ხშირად ერთმანეთს სწორედ ამ საერთო გამოცდილების ისტორიებს ვუზიარებდით.

აგვისტოს პირველ კვირას თოჯინების დღე აღინიშნება ხოლმე, რასთან დაკავშირებითაც კინოკომპანია Warner Bros.-მა საშინელებათა ჟანრის კინოსამყაროს ცნობილი პერსონაჟის — ანაბელის ახალი ვიდეო გაავრცელა, რომელშიც ამ საეჭვო რეპუტაციის მქონე თოჯინის კარანტინში გატარებული დღეებია ასახული.

მაყურებლებში, რომლებიც ანაბელს კარგად იცნობენ, ეს თოჯინა ყოველთვის უსიამოვნო შეგრძნებას აღძრავს ხოლმე და წესით, მისი კარანტინის დღეები დიდად არც უნდა გვაღელვებდეს, თუმცა ეს ვიდეო ამ საშიშ პერსონაჟს სულ სხვა თვალით გვაჩვენებს და მეტიც — ჩვენ მიერ განვლილი მოსაწყენი დღეების კომიკურობას გვახსენებს.

ანაბელი პირველად ფილმ Conjuring-ში გამოჩნდა, რომელიც Deadline-ის ცნობით, $1,8-მილიარდიანი მსოფლიო შემოსავლებით ყველაზე წარმატებული საშინელებათა ჟანრის ფრენჩაიზია.

ამ საშიშ თოჯინაზე დამოუკიდებელი ფილმებიც გადაიღეს 2014, 2017 და 2019 წლებშიც, რომელთა საერთო შემოსავლებმაც თითქმის 800 მილიონი დოლარი შეადგინა.

მართალია, ამ ახალი ვიდეოს მიხედვით ანაბელი საკმაოდ სახალისო დროს ატარებდა კარანტინში, თუმცა იმავეს ვერ ვიტყვით, როგორც მის მწარმოებელ კინოკომპანია Warner Bros.-ზე, ისე მთელ კინოინდუსტრიაზე: პანდემიის გამო შეჩერდა ფილმების გადაღებები, ამავდროულად კი გაურკვეველი ვადით გადადო არაერთი მაღალბიუჯეტიანი ბლოკბასტერის პრემიერა: იქნება ეს კრისტოფერ ნოლანის Tenet, უეს ანდერსონის French Dispatch თუ ჯონ კრასინსკის საშინელებათა ჟანრის გახმაურებული ფილმის A Quiet Place 2.