ალბათ, განსაკუთრებული მოულოდნელობა არავისთვის იქნება, თუ გეტყვით, რომ მაღალი მოლოდინების მქონე მსოფლიო პრემიერები კვლავ გადაიდო.

ერთმანეთის მიყოლებით ისეთმა ცნობილმა კინოკომპანიებმა, როგორებიცაა Disney, Warner Bros. და ა.შ. ცოტა ხნის წინ განაცხადეს, რომ მაყურებლებს ნანატრი ფილმების სანახავად კიდევ დიდხანს მოუწევთ ლოდინი.

მათ შორისაა ჯონ კრასინსკის საშინელებათა ჟანრის გახმაურებული ფილმის A Quiet Place-ის მეორე ნაწილი: ემილი ბლანტის მონაწილეობით ისტორიის გაგრძელების ხილვას 2021 წლის 23 აპრილამდე ვეღარ შევძლებთ.

ასევე შეიცვალა უეს ანდერსონის ახალი ფილმის The French Dispatch-ის საპრემიერო გეგმებიც: კინოსურათის პრემიერა ჯერ კანის წლევანდელ კინოფესტივალზე უნდა შემდგარიყო, შემდეგ ეს თარიღი ოქტომბრამდე გადაიწია, ამჟამინდელი ინფორმაციით კი გაურკვეველია, როდის იხილავს ფილმი მზის სინათლეს — მისი მწარმოებელი კინოკომპანია ზუსტ თარიღს ვერ ასახელებს.

ფოტო: Searchlight

პანდემიის გამო კინოთეატრების ნაწილობრივ ან სრულად დახურვამ ხელი შეუშალა ისეთი გიგანტი კომპანიის გეგმებსაც, როგორიცაა დისნეი: ჯერ კიდევ მარტში დაგეგმილი მულანის პრემიერა ჯერ ივლისამდე გადაიდო, შემდეგ აგვისტომდე, ახლა კი განრიგიდან საერთოდ ამოიღეს.

იგივე ბედი ეწიათ Spider-Man: Far From Home-ის, Star Wars-ისა და Avatar-ის სიქველებს: ფილმების პრემიერა დაგეგმილზე ერთი წლით გვიან შედგება.

მანამდე რამდენიმე დღით ადრე ცნობილი გახდა, რომ კრისტოფერ ნოლანის ახალი ნამუშევრის Tenet პრემიერაც გადაიდო: ნოლანიც კი, რომელიც კინოთეატრების მხარდამჭერი იყო და ბევრი სწორედ Tenet-ს მოიაზრებდა კინოთეატრების მესიად, პანდემიასთან ვერაფერს გახდა.