გიორგი შაქარაშვილის საქმეზე ბრალდებული ზ.ხ-ს ადვოკატის, გიორგი გელხაურის განცხადებით, ამირხანაშვილის, ახვლედიანის, ქათამაძისა და ბრეგვაძის ჩვენებების დაუშვებლად ცნობას მოითხოვს. როგორც მან ჟურნალისტებს უთხრა, იგი სასამართლო პროცესზე ამის შუამდგომლობას დააყენებს.

ადვოკატი არ აკონკრეტებს მოწმეების რომელი ჩვენებების დაუშვებლობის შუამდგომლობით მიმართავს სასამართლოს, თუმცა იგი ამბობს, რომ არაერთხელ შეცვლილი ჩვენება, ამ მოწმეების "არასანდოობაზე" მეტყველებს.

"თუ ვინმემ არ ითანამშრომლა გამოძიებასთან და თუ ვინმემ შეიყვანა გამოძიება ჩიხში, ეს არის ამირხანაშვილი, ახვლედიანი, ქათამაძე, ბრეგვაძე. ეს არიან ის პირები, რომელთაც გამოძიებას დაუმალეს ყველა რეალური გარემოება იმ ღამესვე და 4 სხვადასხვა ჩვენება მისცეს", — განაცხადა ზ.ხ-ს ადვოკატმა.

გელხაურის თქმით, აღნიშნულმა მოწმეებმა გამოძიება "შეგნებულად შეიყვანეს შეცდომაში". როგორც იგი ამბობს, ამ ეტაპზე არანაირი მტკიცებულება არ არსებობს, რომ ზ.ხ-ს ბრალი დაუმძიმდეს.

მცხეთის რაიონულ სასამართლოში, გიორგი შაქარაშვილის გარდაცვალების საქმეზე, 6 არასრულწლოვნის წინასასამართლო სხდომა მიმდინარეობს. ზ.ხ-ს, ლ.შ-ს, ნ.ც-ს, ა.ქ-ს, გ.მ-ს და ნ.ქ-ს გამოძიება ჯგუფური ძალადობის ორგანიზებას, ძალადობაში მონაწილეობას და თავისუფლების უკანონოდ აღკვეთას ედავება.