საზოგადოებრივი ორგანიზაციები მოუწოდებენ მთავრობას, გააუქმოს ოკუპირებული ტერიტორიების მიმდებარე სოფლებში შესვლის შეზღუდვა. მათი განცხადებით, შეზღუდვების დამკვიდრებული პრაქტიკა ხელს უშლის მათ საჯარო საქმიანობის განხორციელებაში და ზღუდავს ინფორმაციის მოპოვებისა და გავრცელების პროცესს.

"მაშინ როცა ინფორმაცია ოკუპირებულ ტერიტორიებზე და მის მიმდებარე სოფლებში მიმდინარე მოვლენების შესახებ შეზღუდულია, ეს ბარიერები კიდევ უფრო აფერხებს ინფორმაციის მიღებას. ეს შეზღუდვები ასევე აფერხებს გამყოფ ხაზებთან მიმდებარე სოფლებში არსებული სოციალური და უფლებრივი მდგომარეობის შესწავლას და საჯაროობაში მათ დაყენებას", — აცხადებენ ორგანიზაციები.

4 NGO მთავრობას მოუწოდებენ გააუქმოს საოკუპაციო ხაზთან და მის მიმდებარე სოფლებში მედიის, სამოქალაქო საზოგადოებისა და პოლიტიკოსების დაშვების ბლანკეტური აკრძალვა და შეიმუშავოს ობიექტურ კრიტერიუმებზე დაფუძნებული მიდგომები, რომელიც არ შეზღუდავს გადაადგილებისა და გამოხატვის თავისუფლებას.

განცხადებას ხელს აწერენ:

  • ადამიანის უფლებების სწავლებისა და მონიტორინგის ცენტრი (EMC);
  • საქართველოს ახალგაზრდა იურისტთა ასოციაცია (საია);
  • ადამიანის უფლებათა ცენტრი (HRC);
  • დემოკრატიის კვლევის ინსტიტუტი (DRI).

საოკუპაციო ხაზის მიმდებარე სოფლებში შეზღუდვა დაბრკოლებას წარმოადგენს ონლაინ მედიებისთვისაც. ხშირად სახელწმიფო უსაფრთხოების სამსახური ოკუპირებულ რეგიონებში ჩასვლის უფლებას მხოლოდ ტელევიზიებსა და საერთაშორისო მედიებს აძლევს.