2020 წლის 15 ივლისიდან 15 აგვისტოს ჩათვლით ვიკიმედიის მომხმარებელთა საქართველოს ჯგუფი ქართულ ვიკიპედიაში ატარებს ახალ კონკურს — "ქვეყნები და დედაქალაქები ვიკიპედიაში", რომლის მიზანია ქართულ ვიკიპედიაში მსოფლიოს ქვეყნებისა და მათი დედაქალაქების შესახებ არსებული სტატიების გაუმჯობესება.

ვიკიმედია მომხმარებელთა საქართველოს ჯგუფი კონკურსში მიღებული ქულების რაოდენობით გამარჯვებულ მონაწილეებს (ხუთი საპრიზო ადგილი) დააჯილდოებს შემდეგი პრიზებით:

● პირველი ადგილი : ველოსიპედი

● მეორე ადგილი : ტელესკოპი

● მესამე ადგილი : ყავის აპარატი (მეამა)

● მეოთხე ადგილი : სმარტ საათი

● მეხუთე ადგილი : გარე დამტენი (PowerBank)

საპრიზო ადგილების პრეტენდენტებმა სრულყოფილად მინიმუმ 5 სტატია მაინც უნდა გააუმჯობესონ.

ვიკიმედიის მომხმარებელთა საქართველოს ჯგუფის ერთ-ერთი მთავარი მიზანია ვიკიმედიის პროექტების (განსაკუთრებით ვიკიპედიის) კონტენტის გაზრდა, ქართულ ენაზე. ამ მიზნის მისახწევად ვმ საქართველოს ჯგუფი მართავს სხვადასხვა კონკურსებს ქართულ ვიკიპედიაში.

ვიკიმედიის მომხმარებელთა საქართველოს ჯგუფი (ვმ საქართველო), არის ოფიციალურად რეგისტრირებული არასამეწარმეო (არაკომერციული) იურიდიული პირი, რომელიც წარმოადგენს ფონდ ვიკიმედიის მომხმარებელთა ჯგუფს. ფონდი ვიკიმედია აშშ–ში დაფუძნებული არაკომერციული ორგანიზაციაა, რომელიც მუშაობს და მართავს ვიკიმედიის პროექტებს. ვიკიმედიის მომხმარებელთა საქართველოს ჯგუფი შეიქმნა 2015 წელს, საქართველოში მცხოვრები ვიკიმედიის პროექტების აქტიური წევრების მიერ, რომლებიც დაინტერესებულნი არიან ეროვნულ დონეზე გამართული ღონისძიებების ორგანიზებითა და მონაწილეობით.

წევრების მიზანია ხელი შეუწყონ და მონაწილეობა მიიღონ ფონდ ვიკიმედიის მიერ შემოთავაზებულ პროექტებში და ქართული ვიკისაზოგადოების მიერ ორგანიზებულ პროექტებში. ორგანიზაციის ერთ-ერთი ძირითადი მისიაა ხალხის დახმარება და წახალისება, საზოგადოებრივ დომენში ცოდნის და სხვა საგანმანათლებლო, კულტურული და ისტორიული შინაარსის მასალის შეგროვება, განვითარება და გავრცელება, ან სხვა ლიცენზიების საშუალებით, რაც საშუალებას აძლევს ყველას თავისუფლად გამოიყენოს ცოდნა, განათავსოს და შეცვალოს მისი შინაარსი უფასოდ.