ადვოკატ მიხეილ რამიშვილის განცხადებით, გარდაცვლილი თამარ ბაჩალიაშვილის კომპიუტერი მის გარეშე გახსნეს. როგორც რამიშვილმა On.ge-ს განუცხადა, გამომძიებლებთან პირობა ჰქონდა დადებული, რომ კომპიუტერს ლუქს მისი თანდასწრებით მოხსნიდნენ. კომპიუტერის სკანირება უკვე დაწყებულია.

"მრავალჯერ ჰქონდა გამომძიებელს ნათქვამი, რომ ეს ჩემი თანდასწრებით მოხდებოდა. როცა მივედი და შემატყობინეს, რომ კოდი აღმოჩენილი იყო და შესაძლებელი იყო ჩემი თანდასწრებით დაფიქსირებულიყო და მომხდარიყო წვდომა კომპიუტერზე, უკვე გახსნილი დამხვდა. ლუქი ჰქონდა მოხსნილი, რამაც ბევრი კითხვა დაბადა, რატომ იყო ლუქი მოხსნილი, ძველი შეთანხმება რატომ იყო დარღვეული, რამაც დაპირისპირება გამოიწვია", — ამბობს რამიშვილი.

ადვოკატს ეჭვი უჩნდება, რომ კომპიუტერის კოდის მოძებნა გამოძიებამ მას შემდეგ დააჩქარა, რაც კომპიუტერის გახსნისთვის აშშ-ს ფედერალური ბიუროს ექსპერტების ჩართვის შესახებ განცხადება გააკეთა. ამასთან, იგი კვლავ აპირებს უცხოელი სპეციალისტების ჩართვას.

"აუცილებლად ჩავრთავ ექსპერტებს. უნდა გავიგო, ეს პერიოდი, რაც ეს გოგონა დაიკარგა და გუშინდელი გახსნის შუალედში ხომ არ იყო იქ წვდომა ვინმეს მიერ, ამ შემთხვევაში, ექსპერტიზას ხომ არ ჰქონდა წვდომა და ხომ არ არის იქიდან რამე წამოღებული", — აღნიშნავს რამიშვილი.

რაც შეეხება თამარ ბაჩალიაშვილის წაშლილ ფეისბუქგვერდს, ადვოკატი აღნიშნავს, რომ ინფორმაცია არ აქვს, ეს როგორ მოხდა.

"რადგან ეს ნდობა შეილახა და არც ოჯახს და არც საზოგადოებას არ აქვს, პირდაპირ დავუყენე საკითხი, კეთილი ინებონ და მიმართონ ფეუსბუქს და გაიგონ ვისი მისამართიდან მოხდა ეს", — განაცხადა რამიშვილმა.

თამარ ბაჩალიაშვილის ოჯახი გარდაცვლილის კომპიუტერის გახსნასა და იქიდან ინფორმაციის ამოღებას, ქალის დაკარგვის პირველივე დღეებიდან ითხოვდა. როგორც ქალის მამა, ჯუმბერ ბაჩალიაშვილი აცხადებდა, რომ ჯერ კიდევ ძებნის პერიოდში საგამოძიებო ორგანოებიდან შეატყობინეს, რომ თამარის კომპიუტერი გახსნეს და "ის შარში იყო".

მოგვიანებით ჯუმბერ ბაჩალიაშვილმა თქვა, რომ მას ქვემო ქართლის პოლიციის დეპარტამენტის უფროსის მოადგილე, ლადო ბაჭულაშვილი დაუკავშირდა. ბაჭულაშვილი შინაგან საქმეთა სამინისტროს გენინსპექციაში გამოკითხვაზე დაიბარეს. ის აცხადებს, რომ მსგავსი რამ ჯუმბერ ბაჩალიაშვილისთვის არ უთქვამს.

თამარ ბაჩალიაშვილის საქმე

23 წლის თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს. საქმეზე გამოძიება თავისუფლების უკანონო აღკვეთის მუხლით მიმდინარეობდა. 24 ივლისს საქმეს კიდევ ერთი კვალიფიკაცია თვითმკვლეოობამდე მიყვანის მუხლი დაემატა.

დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ოჯახი გამოძიებას უნდობლობას უცხადებს და საქმეში დამოუკიდებელი ექსპერტი ჩაერთო. მათთვის გაურკვეველია, როგორ ვერ იპოვეს მანქანა 4 დღის განმავლობაში, თუკი სამძებრო სამუშაოებში ჩართული იყო დრონი. ადვოკატს, ასევე, აქვს კითხვა, რატომ იპოვა მანქანა მწყემსმა და ვერ მოახერხა ეს პოლიციამ.

ადვოკატის ინფორმაციით, გარდაცვლილის მანქანაში იპოვეს მისი ტელეფონი, რომელიც გამორთული იყო და ამოღებულია სხვადასხვა მედიკამენტიც. რამიშვილს არ აქვს ინფორმაცია, კონკრეტულად რა პრეპარატებია, თუმცა აცხადებს, რომ ფსიქოტროპული არ არის.

სოციალურ ქსელებში და მედიაში გაჩნდა კითხვები ბაჩალიაშვილის სამსახურთან დაკავშირებით. ბაჩალიაშვილს LinkedIn-ის თანახმად, დეველოპერად ორ კომპანიაში, ზეგ-სა და ავსტრიულ Spryflash-ში მუშაობდა. კომპანია ზეგში დღეს შსს შევიდა. დირექტორი ამტკიცებს, რომ ბაჩალიაშვილის გარდაცვალება ზეგ-ში საქმიანობას არ უკავშირდება.

ამავე თემაზე: