ზეგ-ის დირექტორი, თამარ კობერიძე ამბობს, რომ თამარ ბაჩალიაშვილის გარდაცვალება მის სამსახურს არ უკავშირდება. მისივე თქმით, გარდაცვლილი მათ კომპანიაში რიგითი პროგრამისტი იყო.

"არანაირად არ შეიძლება უკავშირდებოდეს [სამსახურს], რადგან არანაირი პრობლემა არ ჰქონია. ძალიან კარგი გოგო იყო, რომელიც კონფლიქტში არავისთან იყო", — უთხრა კობერიძემ ჟურნალისტებს.

რაც შეეხება ბაჩალიაშვილის სამსახურიდან წასვლას, კობერიძე განმარტავს, რომ ამის შესახებ ინფორმაცია ჰქონდა:

"ვიცოდი, რომ შეიძლება წასულიყო, რადგან ბევრჯერ გაჟღერებულა, რომ ბევრ სამსახურში ვმუშაობ, თან ვსწვალობ და თან ბევრი დრო აღარ მაქვს. ვიცი, რომ ეს ლაპარაკი ჰქონია. ჩემთვის სიურპრიზი არ ყოფილა, როცა გავიგე, სამსახურიდან მიდიოდა".

რაც შეეხება კითხვას, თუ რატომ არ ეუბნებოდა ბაჩალიაშვილი ოჯახს, სად მუშაობდა, კობერიძე პასუხობს:

"მე ვფიქრობ იმიტომ, რომ რთულია ახსნა პროგრამისტი, მშობლებს აუხსნა, აი ეს მგონია, თორემ დამალული არაფერი არაა".

გარდაცვლილის მამა, თამარის გარდაცვალებას სამსახურს უკავშირდებს. მისი თქმით, სამსახურში ის ზეწოლის ქვეშ იყო და ხშირად ნამტირალევიც იყო.

თამარ ბაჩალიაშვილს LinkedIn-ის თანახმად, დეველოპერად ორ კომპანიაში, ზეგ-სა და Spryflash-ში მუშაობდა.

23 წლის თამარ ბაჩალიაშვილი, რომელსაც ხუთი დღე ეძებდნენ, თეთრიწყაროს ტყეში, მანქანაში გარდაცვლილი იპოვეს. თამარ ბაჩალიაშვილი 18 ივლისს დაიკარგა. როგორც ოჯახის წევრები ყვებიან, ის საკუთარი მანქანით ქვემო ფონიჭალიდან გავიდა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს, მაგრამ სამძებრო სამუშაოების მიუხედავად, ავტომობილს და ქალს ვერ მიაგნეს.

ამავე თემაზე: