გარდაცვლილი თამარ ბაჩალიაშვილის ოჯახის ადვოკატის, მიხეილ რამიშვილის თქმით, ბაჩალიაშვილი რამდენიმე დღის გარდაცვლილია. ამის შესახებ ადვოკატმა ცხედრის ნახვის შემდეგ განაცხადა.

"ისეთ მდგომარეობაშია მაგას ექსპერტები დაათვალიერებენ. არ ჩანს არაფერი, იმიტომ რომ [ცხედარი] ისეთ ფერში არის... ნამდვილად რამდენიმე დღის გარდაცვლილია... [ცხედარი] ცუდი ფერის არის", — განაცხადა რამიშვილმა.

23 წლის თამარ ბაჩალიაშვილი, რომელსაც 5 დღე ეძებდნენ, თეთრიწყაროს ტყეში, მანქანაში გარდაცვლილი იპოვეს.

თამარ ბაჩალიაშვილი 18 ივლისს დაიკარგა. როგორც ოჯახის წევრები ყვებიან, ის საკუთარი მანქანით ქვემო ფონიჭალიდან გავიდა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს, მაგრამ სამძებრო სამუშაოების მიუხედავად, ავტომობილს და ქალს ვერ მიაგნეს.

21 ივლისს დაკარგული 23 წლის ქალის ახლობლებმა ფონიჭალაში გზა გადაკეტეს. ისინი გამოძიებასთან დაკავშირებით ინფორმაციას ითხოვდნენ. მათთან შესახვედრად საქმის გამომძიებელი მივიდა. ოჯახის ახლობლების განცხადებით, ეს პირველი შემთხვევაა, როცა მათ საქმის მიმდინარეობაზე ინფორმაცია მიაწოდეს.