გარდაცვლილი თამარ ბაჩალიაშვილის ოჯახის ადვოკატი, მიხეილ რამიშვილი ამბობს, რომ ცხედარი მანქანის უკანა სავარძელში იპოვეს. მისივე თქმით, საქმეში დამოიკიდებელი ექსპერტების ჩართვას გეგმავს.

"ავტომობილში იყო ახალგაზრდა ბავშვი. უკანა სავარძელში იყო. ავტომობილი გაიხსნა, მიმდინარეობს შესაბამისი მოქმედებები, ექსპერტიზის წარმომადგენლები არიან , რომლებიც ყველა იმ მოქმედებებს ახორციელებს, რაც საჭირო არის. რადგან გიორგი შაქარაშვილის საქმიდან გამომდინარე ექსპერტების მიმართ არ გამაჩნია სრულყოფილი ნდობა, ჩვენი მხრიდან ჩაერთვებიან დამოუკიდებელი ექსპერტები", — განაცხადა რამიშვილმა.

23 წლის თამარ ბაჩალიაშვილი, რომელსაც ხუთი დღე ეძებდნენ, თეთრიწყაროში, მანქანაში გარდაცვლილი იპოვეს.

თამარ ბაჩალიაშვილი 18 ივლისს დაიკარგა. როგორც ოჯახის წევრები ყვებიან, ის საკუთარი მანქანით ქვემო ფონიჭალიდან გავიდა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს, მაგრამ სამძებრო სამუშაოების მიუხედავად, ავტომობილს და ქალს ვერ მიაგნეს.

21 ივლისს დაკარგული 23 წლის ქალის ახლობლებმა ფონიჭალაში გზა გადაკეტეს. ისინი გამოძიებასთან დაკავშირებით ინფორმაციას ითხოვდნენ. მათთან შესახვედრად საქმის გამომძიებელი მივიდა. ოჯახის ახლობლების განცხადებით, ეს პირველი შემთხვევაა, როცა მათ საქმის მიმდინარეობაზე ინფორმაცია მიაწოდეს.