შინაგან საქმეთა სამინისტროში განმარტეს, რატომ დასჭირდა თამარ ბაჩალიაშვილის მანქანის მოძებნას ოთხი დღე. როგორც კრიმინალური პოლიციის დეპარტამენტის დირექტორმა, მამუკა ჭელიძემ განაცხადა, მანქანის მოძრაობის მარშრუტი და შემთხვევის ადგილს არ ემთხვევა, რის გამოც მანქანა მალე ვერ მოიძებნა.

ჭელიძის თქმით, 23 წლის ქალი სახლიდან დილის ათი საათისთვის გავიდა და, დაახლოებით, 20 წუთში სოფელ ხაიშის ჭკვიან კამერებზე დაფიქსირდა.

"კამერების დათვალიერების შედეგად, თამარ ბაჩალიაშვილის კუთვნილი ავტომანქანა ბოლოს დაფიქსირდა თეთრიწყაროს მუნიციპალიტეტის სოფელ ხაიშის "ჭკვიან" კამერაზე, სადაც ჩანს, რომ მანქანას იგი თავად მართავდა. აღნიშნულის შემდგომ, პოლიციის მიერ საძიებო სამუშაოები გაგრძელდა ხაიშის მიმდებარე ტერიტორიაზე, მათ შორის, გამოიკითხა ადგილობრივი მოსახლეობა", — აღნიშნეს შსს-ში.

როგორც ჭელიძე ამბობს, სამძებრო სამუშაოებისთვის დრონებიც გამოიყენეს, თუმცა მანქანის ფიქსაციის ლოკაცია სხვა არეალში იყო, რის გამოც მანქანის მოძებნა გაჭიანურდა.

"ბოლო ფიქსაცია, სადაც აღმოჩნდა, საგამოძიებო ორგანო ამ მიმართულებით მუშაობდა. ტერიტორიულად რომ ავხსნა, ორი სხვადასხვა მიმართულებაა. ძებნის სამუშაოები არაერთი ყოფილა ჩვენს პრაქტიკაში, მაგრამ ზოგ შემთხვევაში უფრო ადვილად აგნებს სამაშველო ჯგუფები, არსებობს მეტი კამერა, მეტი კვალი. რაღაც შემთხვევაში ეს რთულდება, კლიმატური პირობების თუ არეალის გათვალისწინებით. ზუსტად ეს ფაქტორი გახდა იმ სხვა ლოკაციაზე ძებნის აუცილებლობა. საგამოძიებო ორგანოს ჰქონდა ვალდებულება ზუსტად იმ მიმართულებით ემუშავა, თუმცა იმ ადგილზე არ აღმოჩნდა.

თუმცა როგორც მოგახსენეთ, მისი მანქანის ფიქსაცია და გადაადგილების მარშრუტი არ ემთხვევა შემთხვევის ადგილს, არის დაშორებული დაახლოებით 15 კილომეტრის რადიუსით", — აგანაცხადაჭელიძემ.

თამარ ბაჩალიაშვილის საქმე

23 წლის თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს. საქმეზე გამოძიება თავისუფლების უკანონო აღკვეთის მუხლით მიმდინარეობდა. დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ოჯახი გამოძიებას უნდობლობას უცხადებს და საქმეში დამოუკიდებელი ექსპერტი ჩაერთო. მათთვის გაურკვეველია, როგორ ვერ იპოვეს მანქანა 4 დღის განმავლობაში. შსს-ს განმარტებით, მანქანის მოძრაობის მარშრუტი და შემთხვევის ადგილს არ ემთხვევა, რის გამოც მანქანა მალე ვერ მოიძებნა.

უწყებაში ამბობენ, რომ პირველადი დათვალიერებით, ბაჩალიაშვილის სხეულზე ძალადობის კვალი არაა. დამოუკიდებელი ექსპერტების თქმით, კი ცხედარზე ზედაპირული ტრავმული დაზიანებების აღმოჩენა შეუძლებელი იყო, რადგან გვამური მოვლენები შორსაა წასული.

გარდაცვლილის მანქანაში ამოღებულია სხვადასხვა მედიკამენტი. ადვოკატის თქმით, ისინი ფსიქოტროპული არ არის. შსს-ში აცხადებენ, რომ ბაჩალიაშვილმა 17 ივლისს შეიძინა წამლები და ცდილობენ დაადგინონ მანქანაში იგივე წამლებია თუ არა. გარდა ამისა, მანქანაში იპოვეს ჩანაწერი ანაბრის გამოყენების შესახებ. შსს-ში ამბობენ, რომ ბანკიდან ინფორმაცია ამოიღეს და ამოწმებენ.

სოციალურ ქსელებში და მედიაში გაჩნდა კითხვები ბაჩალიაშვილის სამსახურთან დაკავშირებით. ბაჩალიაშვილს LinkedIn-ის თანახმად, დეველოპერად ორ კომპანიაში, ზეგ-სა და ავსტრიულ Spryflash-ში მუშაობდა. კომპანია ზეგში დღეს შსს შევიდა. დირექტორი ამტკიცებს, რომ ბაჩალიაშვილის გარდაცვალება ზეგ-ში საქმიანობას არ უკავშირდება.