რუსეთმა დონბასის ცეცხლის შეწყვეტის რეჟიმი პირველივე დღეს დაარღვია. ახალდადებული შეთანხმების ფონზე, რომელიც 27 ივლისს, 00:01-ზე შევიდა ძალაში, რუსი სამხედრო ძალები დონბასში უკრაინულ პოზიციებს თავს სამჯერ დაესხნენ.

უკრაინული გამოცემა Unian-ის ინფორმაციით, რუსულმა მხარემ შეთანხმება დილის 7:00 საათზე დაარღვია და უკრაინულ მხარეს ცეცხლი სოფელ ვოდიანესთან სხვადასხვა ტიპის ცეცხლსასროლი იარაღით გაუხსნა. როგორც გამოცემა წერს, უკრაინის გაერთიანებული ძალების ოპერაციების პრეს ცენტრში აცხადებენ, რომ უკრაინულ მხარეს საპასუხო ცეცხლი არ გაუხსნია და შეტევის შედეგად არავინ დაღუპულა.

რუსეთის მხრიდან მსგავსი პროვოკაციული ქმედებები იყო განხორციელებული სოფელ ნოვომიხაილივკასთანაც. გამოცემის ინფორმაციით, აქ რუსებმა უკრაინის პოზიციების მახლობლად სამი POM-2-ის ტიპის ნაღმები ჩამარხეს.

უკრაინის პრეზიდენტი ვლადიმერ ზელენსკი და უმაღლესი სამხედრო ოფიცრები აცხადებენ, რომ ახალი ზავი არ ნიშნავს იმას, რომ მტრის შეტევის საპასუხოდ უკრაინა ვერ შეძლებს ცეცხლის დაბრუნებას.

უკრაინაში, დონბასის რეგიონში კიევის დროით 27 ივლისს, 00:01 საათზე ცეცხლის შეწყვეტის ახალი რეჟიმი ამოქმედდა. შეთანხმების მიღწევა მინსკის სამშვიდობო მოლაპარაკების ფორმატში, სამმხრივი საკონტრაქტო ჯგუფის, ეუთოს, კიევისა და მოსკოვის მუშაობის შედეგად გახდა შესაძლებელი.

უკრაინული მედიის ინფორმაციით, შეთანხმების ამოქმედებამდე უკრაინის პრეზიდენტ ვლადიმერ ზელენსკისა და რუსეთის პრეზიდენტ ვლადიმერ პუტინს შორის სატელეფონო საუბარი შედგა. მათივე ინფორმაციით, ეს პრეზიდენტების პირველი საუბარი იყო ბოლო ხუთი თვის განმავლობაში.

ცეცხლის შეწყვეტის შეთანხმება მოიცავს ისეთ პუნქტებს, როგორიცაა ნებისმიერი სახის საჰაერო ტექნიკის გამოყენების აკრძალვა, დასახლებულ ადგილებსა და მის მიმდებარე ტერიტორიაზე იარაღის გამოყენების აკრძალვა და სხვა.