NDI-ს კვლევის თანახმად, მოსახლეობის 66 პროცენტს სჯერა, რომ ქვეყანაში კორონავირუსის გავრცელებას ხელს ლუგარის ლაბორატორია უშლის. მხოლოდ 4 პროცენტს მი-აჩნია, რომ ის ვირუსის გავრცელების ხელშემწყობია.

ფოტო: NDI

იმათგან, ვინც ფიქრობს, რომ ლუგარის ლაბორატორია ხელს უშლის COVID-19-ის გავრცელებას, 73 პროცენტი მიიჩნევს, რომ ვირუსთან ბრძოლისთვის ლაბორატორია ძალიან მნიშვნელოვანია.

ფოტო: NDI

NDI ფოკუს ჯგუფებიდან რამდენიმე ციტატაც მოჰყავს:

"არა მგონია, რომ მსოფლიომ საქართველოს ნება დართოს, რომ ეს ბიოლოგიური იარაღი გააკეთოს ლუგარის ლაბორატორიაში, მაგრამ ერთს კიდევ ვაღიარებ და ვიტყვი, რო ძალიან მაგარი ლაბორატორია გვაქვს ეს ლუგარის სახით. რუსეთის, ალბათ, პოლიტიკური სვლა არის, რო საქართველო შეაძულონ სხვა ქვეყნებს ამით, რომ, აი, იქ ბიოლოგიური იარაღი მზადდება და რამე", — 41 წლის კაცი, უმუშევარი, ბათუმი.

"გამიგია ტელევიზიიდან, რომ თითქოს რუსეთს აქვს ეჭვი, რომ მათ საწინააღმდეგოდ რაღაცა კეთდება, მაგრამ მე რატომღაც არ მგონია, მაგრამ თუ რამე გაკეთდება თანახმა ვიქნები", — 66 წლის კაცი, თბილისი.

NDI-მ კვლევისთვის სატელეფონო გამოკითხვა და ფოკუს ჯგუფების მეთოდოლოგია გამოიყენა. სატელეფონო გამოკითხვის შემთხვევაში, საველე სამუშაოები 26-30 ივნისს ჩატარდა და შედგა 1 550 დასრულებული ინტერვიუ. ორგანიზაციის ინფორმაციით, რესპონდენტები შემთხვევით ნომერზე დარეკვის მეთოდით შეირჩა და ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით). გარდა ამისა, კვლევა წარმომადგენლობითია თბილისის, ურბანული და სოფლის ტიპის დასახლებებისთვის. საშუალო ცდომილების ზღვარი +/- 2%-ია, თუმცა იცვლება სხვადასხვა კითხვის მიხედვით.

რაც შეეხება ფოკუს ჯგუფებს, საველე სამუშაოები 24-30 ივნისს, ხუთ ქალაქში ჩატარდა: თბილისი, ზუგდიდი, ბათუმი, მარნეული, ახალქალაქი. თითოეულ ქალაქში 2 ფოკუს ჯგუფი იყო: შერეული ასაკი, სქესი და დასაქმების სტატუსი. მონაწილეები შეარჩიეს ორი მეთოდით: CRRC-ის კოორდინატორები მიდიან ქალაქის რამდენიმე ცენტრალურ ადგილას, შემთხვევითად აჩერებენ ადამიანებს და ჯგუფურ დისკუსიაში მონაწილეობას სთავაზობენ და "თოვლის გუნდის" მეთოდი. ფოკუს ჯგუფში დისკუსიას პროფესიონალი მოდერატორი უძღვებოდა, ღია კითხვებით.