კლუბები, ბარები, ფესტივალები და მუსიკალური ღონისძიებების ორგანიზატორები ერთობლივ განცხადებას ავრცელებენ და ხელისუფლებისგან ჯარიმების ჩამოწერასა და "გასართობი ბიზნესის" განმარტების "კულტურული ღონისძიებით" შეცვლას მოითხოვენ.

გარდა ამისა, ისინი ითხოვენ, რომ ჯანდაცვის სამინისტრომ "სადამსჯელო ღონისძიებების" ნაცვლად თანამშრომლობა დაიწყოს და დაწესდეს რეგულაციები, რომლითაც ღონისძიებების ჩატარების საშუალება ექნებათ.

ერთობლივ განცხადებაში საუბარია ჯანდაცვის სამინისტროში გამართულ შეხვედრაზე, რომელსაც მინისტრი, მერიისა და კულტურის სამინისტროს წარმომადგენლები ესწრებოდნენ. მათი თქმით, შეხვედრაზე ისაუბრეს რეგულაციების შემსუბუქებაზე, დაჯარიმების საკითხსა და ბიზნესის ხელშეწყობაზე.

შემოქმედებითი ინდუსტრიის წარმომადგენლები აღნიშნავენ, რომ სწორედ შეხვედრიდან გამომდინარე დაიწყეს ღონისძიებების ორგანიზებაც.

"მალევე მთავრობის მეთაურმა დაავალა საბჭოს განეხილა რეგულაციები ღია სივრცეში ღონისძიებების ჩატარებასთან დაკავშირებით. რადგან შეხვედრის შემდეგ ჩვენთან არანაირი კომუნიკაცია არ ყოფილა, ჩავთვალეთ რომ სწორედ ის დადგენილება შედიოდა ძალაში, რომელიც შეხვედრაზე განვიხილეთ. [...]

საბოლოო ჯამში კი გამოვიდა დადგენილება, რომელშიც არა თუ ის რეგულაციები არ იყო შესული, რისი განხილვაც აღნიშნულ შეხვედრაზე მოხდა, მეტიც, ეს ინდუსტრია საერთოდ ამოღებული იყო კულტურული ღონისძიებების ჩამონათვალიდან და მიენიჭა გასართობი ღონისძიების სტატუსი, რომელზეც ჯერჯერობით არანაირი რეგულაცია არ არსებობს", — ნათქვამია განცხადებაში.

ისინი აცხადებენ, რომ სახელმწიფოს არ აქვს გააზრებული სცენის კულტურული მნიშვნელობა და მსგავსი დამოკიდებულება საფრთხეს უქმნის სცენას, რომელსაც პანდემიის გამო ისედაც რთული მდგომარეობა აქვს. მათივე თქმით, სწორედ ამ დადგენილების გამო 17-18 ივლისს თითქმის ყველა ღონისძიება ტარდებოდა, სადაც ელექტრონულ მუსიკას უკრავდნენ:

"ივენთის ჩატარების ერთადერთი წინაპირობა სწორედ ამ შეხვედრებზე, ამ ბატონების მიერ მიცემული წახალისება იყო. თვითონვე წაგვახალისეს ამოქმედებისაკენ და შემდეგ წესების სრული დაცვის მიუხედავად, ყოველგვარი გაფრთხილების გარეშე თვითონვე დაგვაჯარიმეს".

კლუბების, ბარებისა და ფესტივალების წარმომადგენლები მიუთითებენ შერჩევით დამოკიდებულებაზეც და მაგალითად მოჰყავთ, კიკვიძის პარკში გამართული კონცერტი და დენდროლოგიური პარკის გახსნა.

ისინი მზად არიან შესაბამისი სტრუქტურების წარმომადგენლებს რეკომენდაციების საკუთარი ვერსია შესთავაზონ, რათა, ერთი მხრივ, საქმიანობის საშუალება ჰქონდეთ და მეორე მხრივ, სტუმრების უსაფრთხოება დაცული იყოს.

ამავე თემაზე:

• როცა მთავრობა ელექტრონულ მუსიკას კულტურად არ აღიქვამს
• არ კონტროლდებოდა დისტანციის დაცვა — შრომის ინსპექცია კლუბების დაჯარიმებაზე