თბილისში პარკირების წესების დარღვევაზე ჯარიმები იზრდება. ამის შესახებ თბილისის მერმა, კახა კალაძემ მუნიციპალიტეტის მთავრობის სხდომაზე განაცხადა. მისი ინფორმაციით, ცვლილებები რამდენიმე მიმართულებას შეეხება.

როგორ კალაძე განმარტავს, ცვლილებების თანახმად:

  • A კატეგორიის ტაქსისთვის განკუთვნილ ადგილზე სხვა სატრანსპორტო საშუალების პარკირება — 10 ლარის ნაცვლად, 50 ლარით დაჯარიმდება;
  • ელექტრომობილების დამუხტვისთვის განკუთვნილ ადგილებზე სხვა სატრანსპორტო საშუალების პარკირებაზე ჯარიმაც, 10 ლარის ნაცვლად, 50 ლარი გახდება;
  • ჯარიმის ოდენობა 10-ჯერ გაიზრდება არასწორი პარკირების იმ შემთხვევაზეც, როცა ავტომობილები წლობით იყო გაჩერებული სამეწარმეო, კომერციული საქმიანობის მიზნით.

"მაგალითად, კოტე აფხაზის ქუჩა. არსებობს სხვა ბევრი ქუჩაც, რომელიც დისკომფორტს უქმნის, როგორც ადგილობრივ მოსახლეობას, ასევე სხვა ავტომობილების მძღოლებს. აქ ჯარიმა იყო 10 ლარი და გახდება 100 ლარი. განმეორებით შემთხვევებზე გაორმაგდება და იქნება 200 ლარი", — აღნიშნა კალაძემ.

მისი ინფორმაციით, თუ პირი პარკირების წესების დარღვევისთვის გამოწერილ ჯარიმას ათ კალენდარულ დღეში გადაიხდის, მას ამ ჯარიმის ოდენობა 20%-ით შეუმცირდება.

კალაძემ დღეს ასევე განმარტა, რომ ცვლილებების მიხედვით, ტრანსპორტის გზაზე მიტოვება მხოლოდ სამი თვით იქნება შესაძლებელი, ხოლო შემდეგ პირი 50 ლარით დაჯარიმდება.

გარდა ამისა, ამკრძალავი ნიშნის — "გაჩერება აკრძალულია" ან "დგომა აკრძალულია" მოთხოვნის დაუცველობისას, თუ სამართალდამრღვევი არ იმყოფება სატრანსპორტო საშუალებასთან ან უარს აცხადებს სატრანსპორტო საშუალების ადგილიდან გაყვანაზე, მანქანა შეიძლება სპეციალურ დაცულ სადგომზე გადაიყვანონ ან მისი თვლები სპეციალური საშუალებით დაბლოკონ.

ცვლილება ეხება საჯარიმო ქვითრის ჩაუბარებლობასაც — პარკირების წესების დარღვევაზე საჯარიმო ქვითრის განმეორებით ჩაუბარებლობის ან ჩაბარებაზე უარის თქმის შემთხვევაში, საჯარიმო ქვითარი ოფიციალურ ვებგვერდზე გამოქვეყნდება.