უკვე საკმარისად დიდი ხანი გავიდა, რომ ადამიანები, ვის სახეებსაც ძველი მიმებიდან ვიცნობთ, საკუთარ პოპულარობას შეგუებოდნენ. ზოგმა გადაწყვიტა, ინტერნეტში ვირუსულად მოდებული ფოტოების მიღმა არსებული ისტორიები მსოფლიოსთვის გაეზიარებინა, ან, როგორც ეს ცნობილი "წარმატებული ბავშვის" ფოტოგმირის შემთხვევაშია — უკვე იმდენად დიდები არიან, რომ მზად არიან, ისაუბრონ, რას ნიშნავს, ინტერნეტვარსკვლავად იზრდებოდე.

სემ გრინერი, მუშტით ქვიშაჩაბღუჯული ბიჭი, რომელიც ალბათ მილიონჯერ მაინც შეგვხვედრია სოციალურ ქსელებში, ახლა უკვე თინეიჯერია და საკუთარი მოსაზრებები აქვს იმასთან დაკავშირებით, თუ როგორი გრძნობაა, როცა შენი ბავშვობის ფოტოს მთელი მსოფლიოს ინტერნეტსივრცე აქვს მოცული.

"უცნაურია, ცნობილი ბავშვი იყო", — ამბობს სემი, სანამ დედამისი ახსნის, თუ როგორ იქცა ფოტო პოპულარულად.

2007 წელს, როგორც იგი ჰყვება, ოჯახი სანაპიროზე წავიდა, მან კი ახალი კამერის გამოცდა გადაწყვიტა. გადაღებულ ფოტოებში მისი 11 თვის შვილიც აღმოჩნდა, რომელსაც მუშტით ხრაშუნა ქვიშა ჰქონდა ჩაბღუჯული. დედამ, რომელმაც ჩათვალა, რომ სურათში მისი შვილი ძალიან საყვარელი იყო, ფოტო სოციალურ ქსელში განათავსა და სემის ვარსკვლავური ცხოვრებაც დაიწყო. მისი მშობლები ჰყვებიან, თუ როგორ ადევნებდნენ თვალს ინტერნეტში გამოჩენილ ფოტოს სხვადასხვა ვერსიებს და იმედოვნებდნენ, რომ ბოლოს ორიგინალი ვერსია ყველაზე პოპულარული გახდებოდა.

და იმედი გაუმართლდათ კიდეც, როცა ე.წ. წარმატებული ბავშვის ფოტო მის დამუშავებულ ვერსიებზე პოპულარული გახდა. სემის დედა ამბობს, რომ მისი ვაჟი ნაადრევად დაიბადა და ჩვილს რთული ოპერაციების გადატანა მოუხდა. ამის გამო, ინტერნეტში "წარმატებული ბავშვის" წოდების მოპოვება მისთვის გულისამაჩუყებელი იყო. თვითონ ფოტოს რაც შეეხება, სემი ამბობს, რომ ვერ ჩამოყალიბდა, მოსწონს იგი თუ არა, თუმცა, საბოლოოდ, საკუთარი ვარსკვლავობის უცნაური ისტორია მას და მის ოჯახს დაეხმარა, მამის გადაუდებელი ოპერაციისთვის საჭირო თანხა შეეგროვებინათ.

ახლა კი, მხოლოდ დროის ამბავია, როდის გაიზრდება "არაქისის კარაქით მოთხუპნული ბავშვი", რომელიც მოგვიანებით ფოტოს ისტორიასაც გაგვიზიარებს.