დამოუკიდებელი დეპუტატი გედევან ფოფხაძე იურიდიულ საკითხთა კომიტეტს ტოვებს. მისი თქმით, არასავალდებულო კომიტეტებში ყოფნის აზრს ვერ ხედავს, რადგან ოპოზიციონერი დეპუტატების პროტესტს არასერიოზულად აღიქვამენ, არმისვლის შემთხვევაში კი აჯარიმებენ. მისივე თქმით, რეგლამენტიდან გამომდინარე, მხოლოდ ერთ სავალდებულო კომიტეტში დარჩება.

"ვერ ვხედავ ვერანაირ საჭიროებას, ორივეში დავრჩე, ვრჩები საპროცედური კომიტეტში. იურიდიულ კომიტეტშში ჩემს ყოფნას არანაირი აზრი არ აქვს. ჩემი აზრით, ტყუილად უნდა მივიდე სხდომაზე, გავაპროტესტო რამე და არ იქნება არავის მიერ სერიოზულად აღქმული, არ მიხვალ და დაგაჯარიმებენ და დაგიქვითავენ ხელფას. ამიტომ, პრაქტიკულად, ვერ ვხვდები, რა ფუნქციას ასრულებენ ოპოზიციონერი დეპუტატები კომიტეტებზე", — განაცხადა მან ჟურნალისტებთან.

გედევან ფოფხაძე იურიდიულ საკითხთა კომიტეტის პირველ მოადგილედაც იყო არჩეული, თუმცა მისმა მაშინდელმა პარტიამ, ქართულმა ოცნებამ მას კომიტეტი დაატოვებინა და მიზეზად ის დაასახელა, რომ გადაწყვეტილება გუნდთან შეუთანხმებელი იყო.

"ფრაქციამ მიიღო გადაწყვეტილება, რომ მე გამომიწვიონ იურიდიულ საკითხთა კომიტეტიდან. შესაბამისად, მე ვეღარანაირ თანამდებობას დავიკავებ კომიტეტში. მე გადაწყვეტილების გაპროტესტებას არ ვაპირებ", — განაცხადა ფოფხაძემ მაშინ.