საპარლამენტო უმრავლესობის წევრი, გედევან ფოფხაძე იურიდიულ საკითხთა კომიტეტში აღარ იქნება. ამის შესახებ მან რამდენიმე წუთის წინ ქართულ ოცნებაში ბიძინა ივანიშვილთან შეხვედრის შემდეგ განაცხადა.

"ფრაქციამ მიიღო გადაწყვეტილება, რომ მე გამომიწვიონ იურიდიულ საკითხთა კომიტეტიდან. შესაბამისად, მე ვეღარანაირ თანამდებობას დავიკავებ კომიტეტში. მე გადაწყვეტილების გაპროტესტებას არ ვაპირებ. საკითხი არის არა ის, ვინ სად იქნება, არამედ ის, თუ როგორ ჩაატარებს პარლამენტი უზენაესი სასამართლოს მოსამართლეობის შერჩევის პროცესს", — განაცხადა ფოფხაძემ.

მისი თქმით, დეტალებზე ფრაქციის წარმომადგენლები ისაუბრებენ.

კითხვაზე, იკრძალება, თუ არა განსხვავებული აზრის საჯაროდ დაფიქსირება, ფოფხაძე პასუხობს, რომ ეს დაადასტურა პარლამენტის თავმჯდომარე ირაკლი კობახიძემაც. მისი თქმით, ამის შესახებ კობახიძის პოზიციაა, რომ აზრთა სხვადასხვაობა იყოს გუნდში, თუმცა საჯაროდ ერთიანი პოზიციით წარდგნენ ხოლმე.

დაპირისპირება ქართულ ოცნებაში

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.