სურსათის ეროვნული სააგენტოს ინფორმაციით, ხორცის სახეობრივი კვლევის შედეგად, ეტიკეტზე მითითების გარეშე, 9 ნიმუშში ფრინველის ხორცი აღმოჩნდა.

სახეობრივი კვლევა ცხენის/ვირის ხორცზეც ჩატარდა, თუმცა, როგორც უწყებაში ამბობენ, არცერთ შემთხვევაში დარღვევა არ გამოვლენილა.

ნახევარფაბრიკატები, რომლებშიც ეტიკეტზე მითითებული ინფორმაცია შემცველობას არ შეესაბამებოდა:

  • შპს თავადური 2014 — კატლეტი გაყინული; გუფთა გაყინული;
  • შპს ექსტრა მითი — სოსისი საბავშვო;
  • შპს ხორცპროდუქტების ქარხანა ვაკე — სოსისი საქონლის ვაკე;
  • შპს ოს გრუპი — პილმენი გაყინული;
  • შპს ნიკორა — ხინკალი სამეფო; სოსისი ივერია;
  • შპს ფასანაური 2010 — ფარში ძროხისა და ღორის ხორცის;
  • შპს ხახაბო — გაყინული ხინკალი.

სააგენტოს ინფორმაციით, ინსპექტირების ჯგუფებმა მთელი ქვეყნის მასშტაბით, სხვადასხვა სავაჭრო ობიექტიდან, 40 ნიმუში აიღეს: 20 ნიმუში ცხენის/ვირის ხორცის იდენტიფიცირებისთვის და ასევე 20 ნიმუში ფრინველის ხორცის იდენტიფიცირებისთვის. უწყებაში ამბობენ, რომ ისინი აკრედიტებულ ლაბორატორიაში (ხარისხის ლაბორატორია — LLC Quality Lab) გამოიკვლიეს.

მათივე ინფორმაციით, უკვე გაატარეს კანონმდებლობით გათვალისწინებული ღონისძიებები — ბიზნესოპერატორები დაჯარიმდნენ და სურსათის ბაზრიდან გამოთხოვა დაევალათ.