ევროპული საქართველოს წევრის, გიორგი კანდელაკის თქმით, მთავრობა Wizz Air-ს ფრენების უფლებას არ აძლევს. როგორც ის ამბობს, ეკონომიკის სამინისტრომ ტურიზმის სექტორში დასაქმებულ ადამიანებს არაოფიციალურად განუცხადა, რომ ავიაკომპანია გერმანიასა და საფრანგეთში არჩევნებამდე ვერ იფრენს, ბალტიის ქვეყნებზე კი პასუხი ჯერაც არ აქვთ.

"მთავრობის სურვილია, რომ ჩვენი ტურიზმისა და ეკონომიკისთვის ესოდენ მნიშვნელოვანმა გადამზიდავმა, როგორიც Wizz Air-ია, არჩევნებამდე რეგულარული რეისები საერთოდ არ შეასრულოს. მთავრობა გვიმტკიცებს, რომ გადაწყვეტილებებს ეპიდემიოლოგიური ვითარებიდან გამომდინარე იღებენ. სინამდვილეში, მათი გადაწყვეტილებები მთლიანად პოლიტიკურია, რაც შიმშილისთვის წირავს ათიათასობით ჩვენს მოქალაქეს", — განაცხადა კანდელაკმა.

მისივე თქმით, სტუდენტები რომლებსაც გერმანიაში მოკლევადიანი სამუშაო კონტრაქტები აქვთ, სწორედ Wizz Air-ის "დე ფაქტო აკრძალვის" გამო ზარალდებიან.

გარდა ამისა, კანდელაკის ინფორმაციით, ავიაკომპანია ეარ ბალტიკს რიგაში კვირაში სამი რეისის შესრულება სურს, ეკონომიკის სამინისტრო კი ამჟამინდელი მდგომარეობით მხოლოდ ერთს თანხმდება.

"ავიაკომპანიების ეკონომიკაში ფასწარმოქმნის მნიშვნელოვანი ფაქტორი ფრენების სიხშირეა. არსებული აბსურდული და ბრიყვული შეზღუდვების შედეგად მივიღებთ რეალობას, როცა გვექნება ძალიან ცოტა და ძალიან ძვირი ფრენა, საქართველოს მოქალაქეები კი ვერც ქვეყნიდან გასვლას შეძლებენ და დე ფაქტო ვერც შემოსვლას მათთვის გადაადგილების შესაზღუდად აღმართული დისკრიმინაციული ბარიერების გამო", — განაცხადა კანდელაკმა.

30 ივნისს მედიაში გავრცელდა ინფორმაცია, რომ ავიაკომპანია ქვეყანაში ბაზას ხურავდა, თუმცა ოფიციალური განცხადება ამასთან დაკავშირებით არ გავრცელებულა. ბაზის დახურვა არ ნიშნავს ბაზრიდან გასვლას. თუმცა, ეკონომიკის მინისტრის, ნათია თურნავას განცხადებით, Wizz Air საქართველოში რჩება და ხელისუფლებასთან თანამშრომლობას აგრძელებს.

ნათია თურნავას თქმით, ახალი კორონავირუსის პანდემიამდე, Wizz Air საქართველოდან 30-მდე მიმართულებით ოპერირებდა და კიდევ 10-მდე ახალი მიმართულება ჰქონდა დაანონსებული.

უნგრეთის საგარეო საქმეთა მინისტრმა, პიტერ სიიარტომ განაცხადა, რომ დაბალბიუჯეტურმა უნგრულმა კომპანია Wizz Air-მა ოპერაციები და ფრენები არამხოლოდ საქართველოში, არამედ მთელს მსოფლიოში შეამცირა. მისი თქმით, უნგრეთის მთავრობა ყოველთვის ხელს უწყობდა კომპანიის ოპერირებას საქართველოში და ის იმედს გამოთქვამს, რომ Wizz Air მალე იპოვის თავის ადგილს მსოფლიოში.